東網直播三甲搶分戰

今日「中銀人壽香港超級聯賽」於下午2時30分有兩場直播激戰,榜首富力R&F揮軍屯門進襲標準流浪,而東方龍獅則作客理文,合演「2哥鬥3哥」的好戲。由於三甲之間相互只有3分差距,故今戰賽果足以影響各隊的爭標大局,精彩可期!此外,香港足球總會今日兩場比賽繼續向首200位入場的12歲或以下兒童,派發門票乙張,讓他們與球員一起迎接聖誕佳節!(on.cc東網周日下午2時30分直播)

2哥東方龍獅 強勢撼理文

踏入12月,理文明顯回勇,2戰全勝兼轟入10球之餘,上場菁英盃更以6比0炒起標準流浪,盡顯強大攻擊力,惟助教曾昭達承認仍有不少改善空間,尤其出現攻門機會時,都未能好好把握。「達Sir」又覺得理文今季踢出驚喜,全因球員思考速度快︰「我哋行軍速度好似好快,但其實球員都好清晰知道要做啲咩,呢樣嘢係今季最大嘅轉變。」

今仗面對同得13分的東方龍獅,「達Sir」期盼球員心理能及時調整:「之前兩場大勝雖然對士氣好有幫助,但係比賽要逐場計,希望球員唔好自滿。」人腳方面,後衞迪奧高累積5張黃牌需要停賽,東方龍獅借將謝朗軒、劉學銘亦限於借用條例不能上陣。

堅Sir︰傷兵多有顧忌

至於客隊東方龍獅,近2仗均取得勝利,其中一場更是在菁英盃分組賽擊敗理文。今日轉戰聯賽再遇,總監兼主教練李志堅認為比賽關鍵是要小心應付對手的進攻能力。同時,多名主將包括葉鴻輝、黃威、馮慶燁、鍾偉強剛隨香港代表隊出戰東亞盃,「堅Sir」坦言或多或少會有影響,加上他們正面對傷兵潮,讓「堅Sir」有所顧忌:「我哋有啲傷兵未完全好番,例如黃梓浩、徐德帥、李嘉耀、黃威等等,希望佢哋休息足啲,唔想佢哋一返出嚟再受傷,加上聖誕節又有一場波,我哋要好好控制球員嘅體力留放。」

標準流浪打整體 硬頂富力R&F

標準流浪上周出戰菁英盃僅派出兩名外援鬥理文慘吞6蛋,今戰兩位中堅杜馬思及基藍馬獲准放冬假缺陣,教練團承認會對防守力有負面影響,但仍有信心與富力R&F拚到底︰「始終我哋係着重整體踢法,而唔係靠個人能力,有時派年青或者華人球員落場,佢哋執行戰術嘅能力更加強。」流浪教練團亦指,對手或有港腳因出戰「東亞盃」而被收起,但並不代表他們因此獲得優勢︰「富力係一支實力好強嘅球隊,三線都有最好嘅人腳,就算佢哋有球員去咗踢香港隊,相信影響都唔大。」

目前以16分暫居榜首的富力R&F,上輪聯賽以2比0擊敗愉園,主教練楊正光表示從中得到不少啟發︰「上場對愉園我哋雖然好早開咗紀錄,但係無法藉住領先優勢向對方施壓,戰情慢咗令對手加強防守亦係預料之中,再加上佢哋係以1分為目標,駐重兵喺後防,要等到換人後愉園比較開放進攻博一博嘅時候,先攞到第2球去鎖定勝局,呢場波對我哋嚟講係個警惕,因為嚟緊好多對手包括流浪都會傾向防守。」

光Sir︰不可忽視流浪火力

早前代表港隊出戰東亞盃的梁諾恆、基奥雲尼及羅拔圖,則要視乎其狀態才決定上陣與否,同時「光Sir」亦指不可忽視流浪的攻力︰「流浪應該會着重防守多啲,但都唔可以抹殺咗佢哋嘅進攻能力,例如巴辛、林學曦、安基斯同安達最近嘅表現都唔錯,所以唔可以畀對手有任何機會。」