莫蘭扮飛人仲有排學
昨晨NBA常規賽，騎士以114比107擊敗灰熊，惟賽事主角卻係灰熊後衞莫蘭，呢位20歲新星喺第一節期間，重演2000年奧運男籃美國夢幻隊球星卡特，跳過希臘中鋒韋斯嘅「胯下之辱」入樽。莫蘭姿勢分就贏晒，但入樽就失敗咗，睇嚟仲要向卡特學吓嘢先。
模仿卡特經典入樽失敗
身高1米90嘅莫蘭係今季NBA新秀榜眼，雖然佢唔算高大，但勝在彈跳力強，而且夠大膽，面對騎士身高2米08嘅前鋒路夫，竟然無視對手，照樣跳高入樽，幾乎成個人跨過路夫。不過，可能莫蘭太早起跳，加上被路夫阻一阻，結果入樽失敗，但已經贏盡掌聲，以佢嘅潛質，仲有大把進步空間。莫蘭今場波取得8分、5個籃板球、11次助攻。
至於幾乎遭受「胯下之辱」嘅路夫取得21分及13個籃板球，隊友奇勒臣射入全場最高33分，成為騎士贏波功臣。
西岸方面，長期積弱嘅木狼以100比109不敵金塊，慘逢9連敗。值得一提嘅係，金塊「全能中鋒」祖傑，今仗交出22分、10籃板及10助攻嘅「三雙」佳績，係呢位塞爾維亞國手今季第5次，同時累積33次，躋身NBA歷史「三雙王」Top 10，以中鋒來說非常難得。