夏登連續2場三分波「10+」
當今No.1「得分機器」，非占士夏登莫屬！呢位火箭球星近期弗到爆，昨於常規賽繼續展現其「得分王」能力，個人狂取54分帶領火箭作客130比107擊敗魔術。「大鬍子」繼上場射入10球三分波後，今場照辦煮碗又轟10粒，成為史上第2個連續2場入10球或以上三分波球員。
占士夏登目前以場均39.3分名列「得分王」第1位，按數據顯示，今季暫時出現咗10次個人得分「50+」，夏登就獨佔5次，同時三分球連續「10+」更係一大突破，因為之前只有勇士王牌史提芬居里喺2016年2月做過，正正就係勇士總冠軍「二連霸」嗰季！難怪教練迪安東尼大讚火箭「冇得輸」：「今場嘅投射非常出色，當占士夏登有咁癲嘅表現，相信唔會有球隊可以擊敗我哋，亦冇球員可以嘜到佢！」