10年一閏湖人炒巫師10連捷
「紫金兵團」王朝復辟！尋日上演嘅NBA常規賽，洛杉磯湖人主場以125比103大炒巫師，自2009年後再次取得10連勝。湖人兩大主力勒邦占士及安東尼戴維斯擦出火花，「大帝」射入23分及交出11次助攻，而「AD」更搶鏡，取得全場最高嘅26分，仲有13個籃板，連帶隊友麥基都取得「雙雙」——15分及11個籃板球，令湖人大捷而回。
湖人今場佔盡上風，打完第3節已經拋離巫師26分，勒邦占士只係打咗25分鐘就「收夠籌」，第4節安心做觀眾睇波。湖人喺11月取得14勝1負，勝率高達93.3%，亦係自2000年以來，首次單月取得咁高勝出率。
勇士負熱火繼續沉淪
同日多場大戰，上季總冠軍速龍作客贏魔術90比83，取得6連勝；上季總亞軍勇士頹勢未止，作客105比122不敵熱火，近5場輸4場，繼續喺全聯盟「包艇」。