3場激戰寸土必爭
今日「中銀人壽香港超級聯賽」上演第8周餘下3場賽事，2場頭場下午2時30分同時不同地開波，愉園會在斧山道運動場恭迎冠忠南區，而理文則於主場深水埗運動場出擊鬥和富大埔；尾場香港飛馬會在香港大球場硬撼東方龍獅，賽事由原定的晚上8時，提早到下午5時30分舉行，各位球迷務必注意啦！
理文夫添硬撼和富大埔
相隔一個多月再次主場出擊的理文，迎來7日內第3場比賽，主教練陳曉明揚言今場比賽會毫無保留：「之前兩場波我哋都有啲顧忌，今場比賽希望傷嘅球員都踢得番，喺冇後顧之憂嘅情況下，希望可以精銳盡出！」
今仗面對力爭衞冕的和富大埔，「陳Sir」坦言不容忽視：「開季時候大家覺得大埔未必係前列分子嘅主要原因，係佢哋未對聯賽中下游球隊，但係暫時佢哋成績都係好嘅，前鋒嘅個人能力都幾好，我哋唔會輕敵，大家今季都係攻擊力強嘅，今場比賽嘅關鍵相信會係邊一隊能夠抵擋對手嘅攻勢！」陣容方面，隊長列斯奧已傷愈，惟能否候命仍需觀察，然而中場悍將顏樂楓就上陣成疑。
傷兵多馮Sir呻頭痕
和富大埔早前在各項賽事合計取得3連勝，總監兼主教練馮凱文表示球隊上仗在兩度落後下，最終能夠反勝全賴球員爭勝心強。不過，和富大埔雖然走勢強勁，但「馮Sir」透露傷兵問題仍十分嚴峻：「辛祖情況唔太樂觀，上陣機會一半一半，就算踢得都未必正選，而杜度、勞高就肯定踢唔到。」
今戰面對異軍突起的理文，「馮Sir」認為防守需要更加集中：「理文今季進步咗好多，佢哋幾個前鋒都具備入球能力，所以我哋一定要做好防守，之前雖然贏到波，但係始終都係有失波。至於進攻方面，三叉戟冇咗兩個，變相我哋要踢整體，上場波見到我哋靠整體都發揮唔錯，我對今場都好有信心！」
愉園佔地利迎擊冠忠南區
愉園近況低迷，近4場比賽均吃下敗仗，主教練鮑家耀期望球員能重拾信心迎接挑戰：「上場球隊下半場唔夠集中，加上摩域治受傷，後防解圍唔到導致失波，不過呢啲都係經驗嚟，但係輸波嘅經驗唔可以太多，希望佢哋盡快恢復番！踢職業波成績唔好一定有壓力，不過我都成日喺訓練入面同佢哋傾偈，希望佢哋嘅心情可以放鬆番，表現自己。」
Ricky指賽地狹窄難踢
愉園早前曾在「菁英盃」與今仗對手冠忠南區交手，「鮑Sir」表示球隊必先做好自己：「我哋都唔會理對手嘅陣容，最重要嘅反而係我哋自己要踢出水準，先可以同強隊撼。」此戰前鋒陳立明、後衞蕭志豪繼續養傷，上場傷出的中堅摩域治則有望復出。
去仗於完場前連失兩球，最終以3比4不敵富力R&F的冠忠南區，主教練鄭兆聰替球隊感到不值︰「其實上場冇咗列文同迪亞高，我哋已經發揮得好好，甚至乎可以話係理想，最終係踢到最好嘅表現出嚟，只係最後嗰幾分鐘唔夠集中係令人失望，要吸收經驗。其實成場波最唔忿氣就係輸波，就算和波都會覺得攞1分係值得。」「Ricky」預料，儘管球隊有迪亞高傷愈，但今仗作客場地較狹窄的斧山道運動場，將會相當難踢︰「愉園今季喺主場遇過嘅對手都唔差，佢哋識得發揮佢哋嘅主場之利，所以我都有同球員講同喺訓練時預演，球隊點樣應付對手死守，喺缺乏空間情況下製造攻勢。」
香港飛馬當旺挑戰東方龍獅
上仗主場對佳聯元朗，憑查理士完場前絕殺，成功於聯賽「開齋」的香港飛馬，主教練文彼得坦承整體表現仍有待改善︰「球隊上場原本已經就部署去做一啲練習，但就遇着馬高斯喺賽前一日腰部受傷，咁都有少少影響到我哋嘅踢法，咁霎時間要改變踢法，球員未必習慣。」
「文Sir」又謂，即使目前有不少傷兵，但仍對球隊仍充滿信心︰「大衞拉菲爾、馬高斯、陳偉豪同黃俊皓都有傷，未必全部可以趕得切，不過我哋之前都試過喺人腳不整下，對富力踢出一啲味道出嚟！雖然我哋今場可能係比對手有多啲時間休息，但係我哋嚟緊周中都有場『菁英盃』對傑志，所以夾埋都接近喺10日內踢3場，不過都唔會顧慮得咁多。」
堅sir稱「一周三賽」仲頂得住
面對「一周三賽」的東方龍獅，上周聯賽作客不敵傑志後，之後於周中出戰「菁英盃」以2比0擊敗理文，主教練李志堅認為球隊現況尚可，惟今仗除迪高停賽外，在對傑志一仗因傷退下火線的徐德帥亦上陣成疑︰「『一周三賽』嘅情況，暫時嚟講都唔會太擔心，始終上場都有啲輪換，不過喺傷病方面出現一啲情況，除咗黃梓浩骨裂需要時間康復，利馬個狀態亦要去重拾番。」
「堅Sir」續道，今季各支球隊實力較為平均，沒有比較容易應付的賽事，更寄語球員要打醒十二分精神︰「飛馬有好多場波都係後追，今季見到佢哋個韌力喺度，當然要提醒球員要集中啲。我哋有啲有經驗嘅球員喺度，希望處理呢啲情況時可以做好啲。」