高級組銀牌賽開波！
「高級組銀牌賽」揭開戰幔！今午4支球隊會分別在2場首圈賽事亮相，揭幕戰在2時30分開波，由港超新軍愉園於元朗大球場挑戰香港飛馬；同日5時30分則於將軍澳運動場舉行尾場，由佳聯元朗硬撼理文，一同為8強席位而拚盡。
愉園當旺火併香港飛馬
老牌球會愉園今季重返頂級聯賽，上周更取得首場勝仗，主教練鮑家耀直言這3分能增強球員信心：「攞咗3分之後球員心情都會興奮啲，同埋會有信心落場比賽，希望佢哋繼續畀信心自己，始終佢哋都係有能力，係差啲實戰經驗。」鮑家耀還大讚防守方面有明顯進步，惟中場控制能力仍有待提升。
艾度古斯有望演「地標戰」
作為港超新軍，今午於揭幕戰硬撼香港飛馬，「鮑Sir」透露會作輪換：「始終係盃賽，我哋冇咁緊張，畢竟我哋目標係聯賽，今場會畀多啲後生仔上陣，等佢哋攞經驗、感受吓氣氛，就好似張俊軒咁，佢第二場踢都穩定咗好多，希望其他後生仔都一樣係咁！」至於來自西班牙的後衞艾度古斯，終於有機會上演其「地標戰」。
另一邊廂，香港飛馬在聯賽尚未開齋，但主教練文彼得亦事先張揚會作出輪換，讓飛馬在聯賽、盃賽都能派遣不同球員出戰，令戰力就平均地提升。今仗面對「新丁」，「文Sir」就希望以經驗壓過對手，躋身下一圈賽事︰「佢哋實力上未必真係太強，但係佢哋啱啱贏咗流浪，士氣會比我哋好，希望憑藉我哋嘅經驗，可以有啲優勢。」人腳方面，助教兼球員陳偉豪於惡鬥和富大埔的聯賽中，因與大埔球員起衝突被逐，今仗要坐波監，惟「文Sir」認為事件對球員心理及士氣都未有帶來負面影響。
佳聯元朗放膽踢進襲理文
同日另一場首圈賽事，佳聯元朗及理文會師將軍澳運動場，為8強席位而努力。佳聯元朗開季2場聯賽表現不俗，主教練陳文俊認為球隊有不少進步空間，尤其要改善失波後的反應不夠快的陋習。因此，「陳Sir」明言今仗即使是盃賽，也不會刻意變得保守，務求「以戰養戰」，提升進攻火力。
不過，「陳Sir」亦同意今仗對手不易應付︰「理文經過兩年嚟嘅磨合，睇到成隊波嘅合作性愈嚟愈強大，再加上人腳調動令後防用波嘅情況比之前更加理想，少咗啲協調上嘅問題，整支球隊好似上咗個層次，佢哋前面攻擊點嘅個人能力好強，所以我覺得會好難防。」
理文要嚴防過早失波
至於新季令人眼前一亮的理文，主帥陳曉明認為他們今季進步不少，但強調於盃賽需要更加謹慎，防止太早失第一球，打亂己隊的比賽節奏，「曉明Sir」表示：「我哋仲有好多嘢可以改善，譬如話一啲失波都透過開會去檢討返。其實元朗今年都維持番以往嘅風格，無論教佢哋嘅係曾昭達、郭嘉諾定係陳文俊，佢哋都係香港少有地可以建立自己風格嘅球隊，踢法簡單亦有速度同活力，佢哋外援都有一定實力，整體維持到好快嘅反擊同壓迫。」
陳焌鏗、何彥霆報道