歐冲：出場機會大於一切
備受關注的新兵歐陽耀冲昨日亦有亮相標準流浪開操，新季將披上89號球衣的他明言出場機會大於一切：「其實我有接洽南韓K2嘅球會，係十幾日前先知去唔到，嗰時好多球隊已經埋晒班、甚至開晒操，我本身都識Philip，佢畀好大自由度我，我相信會有好多出場機會。」
提點師弟唔可以怯
現年30歲的「歐冲」期望憑藉自己的經驗，協助一眾師弟成長：「希望做到老大哥角色，帶好隊波，球隊有好多年輕球員係首次踢港超，佢哋要多啲出場先會進步，希望佢哋落到場少啲犯錯，我會喺練習時捉佢哋緊啲。」「歐冲」續說：「佢哋大部分都唔係全職，好多仲讀緊書，嚟到職業就唔可以驚，但係佢哋依家心理上都仲係有啲恐懼，要踢多啲比賽先會進步。」
問及會否再次外流時，他謂：「出場機會當然係首要條件，今季先唔諗其他因素，最重要係出場機會。至於外流方面，如果你有表現嘅話，再外闖都唔係問題。」