400萬組軍倉促繼續培育新血 標準流浪望再創奇迹

標準流浪原訂繼續征戰港甲，但在夢想FC突然宣告退出的情況下，流浪應足總邀請升上港超聯。雖然組軍倉促，Philip希望能重溫千禧好夢：「贊助商標準錶針每年都做咗個Budget，舊年使咗3百萬多啲，都係全職訓練，所以今年就同舊年差唔多，定咗3百幾萬，『莫生』（會長莫耀強）就畀夠4百萬，喺港甲嚟講係足夠嘅。突然一個消息，足總要我哋踢番港超，咁我哋開會研究過，希望揸住咁多錢睇吓做唔做到。記得喺2000年，當時60萬都試過，到今日有咁嘅資金，我希望好似當年咁，亦可以培養班新人出嚟。我同班球員傾好都想試吓升、睇吓環境點，依家當然4百萬點打到港超呢？我哋仲四周圍搵緊贊助，希望多啲喇！」

力斟新贊助準備增兵

Philip明言球隊繼續以培育年輕球員為方向：「呢度有一半人係讀緊大專、大學，人工當然係少，但佢哋都好願意，因為抽到時間練波之餘，呢啲係當自己嘅零用錢！希望可以創造奇迹啦，以有限班費去爭取佳績。」其實Philip亦明白球隊處境，故表明新季首要目標為續留港超：「今季就算面對同級對手，我哋都係低啲，希望憑球員嘅努力，操練做好啲，達至護級成功。」

流浪目前仍有1個外援及1個亞援名額從缺，正在試腳的巴西前鋒史提芬彭利拿能否取得一紙合約，要視乎其熱身賽表現，及球會能否覓到新贊助。早前球隊曾與一家內地贊助商洽談，該贊助商屬意以珠海球場作主場，惟此建議在足總反對下告吹。據Philip透露，該贊助商仍有望贊助球隊，雙方於本月中後期進一步商討。另外身兼教練及球員的黃展鴻表示，球隊開季前會與All Black FC、佳聯元朗及甲組球隊友賽，以提升狀態迎接新季來臨。

圖/文：何彥霆、陳焌鏗