班費1500萬新兵過一打 和富大埔雙帥挑戰亞洲賽

新季兼任球隊總監，與郭嘉諾同時出任主教練的馮凱文（大頭文）透露，接掌球隊後便力邀足球理念跟自己相近的『嘉諾Sir』幫忙︰「其實當凱景落實降班之後，我就冇諗過會繼續喺港超呢個平台執教，大約6月尾喺一個機緣巧合下同和富大埔接觸，去到7月頭就正式接手呢支上季港超冠軍。我都知道自己上季護級失敗，嚟到衞冕球隊，身份會有少少尷尬，所以第一時間搵『郭Sir』幫手，因為佢係我近年比較欣賞嘅教練。」

「大頭文」續稱：「另一個搵『嘉諾Sir』嘅原因，係我哋目標好一致，大家都好重視本地球員，佢之前教出好成績嘅同時，亦重用年輕球員。嚟緊一年我哋除咗希望保持好成績之外，都想發掘年輕小將。」

「雙帥」馮凱文（左）與郭嘉諾互補長短。	切燒豬開操大吉！	辛祖（右二）決心挑戰神射手寶座。

目標一致互補長短

「馮Sir」強調，球隊新季不會放棄參與亞洲賽，班費則維持約1,500萬港元，雖然新兵已超過一打，仍會繼續物色新球員︰「我哋加入咗幾位有質素同有經驗嘅球員，例如陸志豪同陳文輝，亦有車潤秋重返大埔，加埋原有嘅人腳，我相信呢個班底唔差。目前仲有一啲中堅外援斟介中，會喺稍後落實，個別位置亦會加人增強實力。」「綠戰士」將於月中前往泰國集訓，並於當地跟泰超及泰甲球隊進行3場友誼賽。

另一主教練郭嘉諾透露自己在8至11月需赴雲南繼續修讀專業級教練牌照（Pro License）課程，加上出戰亞冠盃外圍賽需有一個擁有Pro License的主教練，故他說「雙教練」的安排「十分吸引」。吸引「郭Sir」的，還有新挑戰：「我教過嘅大部分球隊都係冇乜資源，但好開心冇乜資源、好多年輕球員都得到唔錯嘅成績。呢個都係我嚟大埔嘅其中一個原因，我想挑戰自己，試吓唔同崗位，試吓運用一班年輕球員喺亞洲賽爭取好成績，呢樣係我想做到嘅嘢！」他補充謂「馮Sir」的罰球、角球戰術較有心思，能彌補自己的不足，期望這次合作能為大埔，甚至香港隊貢獻更多。

望麥保美陳文輝迎第二春

球隊人腳出現大變動，「郭Sir」對聯賽雖未感樂觀，但仍堅信「足可圓夢」：「我從來冇諗過球隊可以衞冕聯賽冠軍，因為咁講係唔現實，但我希望呢班年輕球員去爭取最好嘅成績。上季球隊攞咗聯賽冠軍，我相信球迷呢個夢未完，希望帶佢哋去亞冠戰場，圓佢哋呢個夢想。」他更期盼陣中多名「失意軍人」如麥保美、陳文輝等，能把握機會迎接職業生涯第二春。

人腳大變No Problem 辛祖有信心再封王

和富大埔獲得去季港超聯冠軍功臣辛祖留效，這位射手揚言：「我想成為神射手，同再次幫球隊攞聯賽冠軍！」

新季繼續披上綠色戰衣的辛祖表明：「我同大埔嘅合約去到出年2月，我好開心可以留隊，新季會盡力幫大埔贏波！」縱然球隊變動大，辛祖仍充滿信心：「雖然有好多隊友離開，但我哋有好多新球員，『嘉諾Sir』、『馮Sir』都係好教練，足球係11個對11個，落到場鍊過先知高低。」

難捨難離車潤秋3度加盟

去季港超聯冠軍和富大埔新季雖流失多名主力，但同時獲車潤秋、陸志豪、陳文輝從冠忠南區來投，三人均盼望能為隊中年輕球員的成長作出貢獻。

陸志豪教小將反勝

繼2016至17球季再度加盟的車潤秋明言：「大埔對我嘅職業生涯好重要，第一次加盟係累積經驗；第二次自己喺南華唔係好順，返嚟攞番啲感覺；今次因為球隊需要我，加上再同『馮Sir（馮凱文）』合作係件好開心嘅事，所以決定來投！」他續說：「我嘅職業生涯依家去到第10季，兜兜轉轉再返嚟。當年我第一次踢大埔，因為仲係外援身份所以冇得踢亞洲賽，今次返嚟有得代表大埔踢亞洲賽，算係彌補番上次嘅遺憾。」他補充謂：「嗰陣我後生靠一班大哥帶住，依家調番轉要帶番一班細嘅，慢慢教吓佢哋，大家打成一片，可能會有唔錯嘅效果。」

至於陸志豪就期望憑藉經驗協助年輕球員成長，特別是在落後時如何扳平，甚至反勝。去季未有入球進帳的他，新季希望保持身體健康並取得入波。陳文輝則稱「嘉諾Sir」給予很大自由度，希望自己踢法比之前進取，同時期望新季爭取到更多出場機會，以及打破入球荒。

圖/文：何彥霆、陳焌鏗