蜜蜂4將見fans 奧禾莫耶拉狂放笑彈
利物浦與多蒙特傳奇隊今日在香港大球場獻技，昨日「蜜蜂兵團」4位名將維丹費拿、真高拿、列度和奧禾莫耶拉，於銅鑼灣出席活動與球迷會面，除為fans簽名、合照外，更即席揮毫「寫大字」，場面熱鬧。
維丹費拿︰真高拿把關叻過我
活動開始前，已有約20名「多迷」在店外等候偶像，4位名宿抵達時即向fans們打招呼。雖然列度與奧禾莫耶拉看似「霸氣外露」，但原來相當健談，提到今日對利物浦名宿的表演賽，奧禾莫耶拉即大放笑彈，話自己到時會「食花生」：「我哋只有一個計劃，就係全程放高波傳畀真高拿，而維丹費拿將會好忙，因為我只會企喺旁邊睇表演！」提起真高拿，這位2米02的長人曾在正式比賽代替列文為多蒙特把關，維丹費拿笑言：「真高拿做龍門仲好過我，佢可以撲到任何波。」列度補充：「將佢哋會互換位置係我哋嘅秘密殺着，千祈唔好話畀紅軍知喎！」
及後，活動主辦單位希望4位留低「墨寶」，要他們用簽名筆在卷軸上面寫「多蒙特」三個中文字，但始終要外國人寫中文實在太難，都似畫畫多過寫字，唯獨留着狂野Dreadlock頭的奧禾莫耶拉寫得最似模似樣，認真「估佢唔到」！
黃雋謙報道