救世主李安納KO字母哥 速龍首闖The Finals
1995創立的多倫多速龍曾出現過卡特、保殊及迪羅辛等球星，惟一直與冠軍無緣，不過今季終打破宿命！這支加拿大球隊昨日在東岸決賽Game 6，憑李安納擔當「救世主」交出27分同17個籃板，表現完勝「字母哥」安迪杜甘普，主場再贏公鹿100比94，在這個系列賽一口氣連贏4場，總場數4比2登上東岸冠軍，成軍24年來首度挺進總決賽（The Finals）！
速龍季前作出球會史上最大賭注，將迪羅辛送到馬刺，換來上季重傷只打過9場波、一心想去洛杉磯嘅李安納。無論球迷、球員及傳媒季前均「睇衰」這項交易。事實上李安納今季常規賽上陣60場，表現未算突出，估不到季後賽化身「救世主」：場均31.4分及8.4個籃板、命中率逾5成、三分球命中率4成，效率之高堪稱MVP級！李安納賽後表示：「帶領球隊殺入總決賽如夢似真，能夠贏得東岸冠軍係我們嘅目標，現時仲未結束，接住要向衝擊總冠軍邁進！」
老大哥路維：仲未滿足
李安納的「波神級」演出固然精彩，不過這支近年全面重建嘅球隊中，控衞路維才是肩負統領重任的主角。年屆33歲的他自2012年加盟速龍後，親身見證着速龍興衰，以往於東岸一直闖不過「勒邦占士」這道高牆，昨仗賽後這位老大哥勁感觸：「呢個冠軍意義重大，我用咗好長時間先走到呢步，我哋每年都輸畀一個人（勒邦占士），今季佢走咗終於有機會，我哋贏咗一支好出色嘅球隊，不過我仲未滿足，要贏埋總冠軍！」完場後路維同兩位囝囝Kameron同Karter激情擁抱慶祝，球迷們都為這位「守得雲開」的老將動容！
（體通天下全程直播總決賽）