速龍歷史性躋身NBA總決賽，美籍華裔球星林書豪亦迎嚟個人首次打總決賽機會，賽後他即時在社交網晒東岸冠軍獎盃。雖然於NBA打滾多年，效力過不少球隊，而且一度創造瘋魔全球的「Linsanity」，不過這位後衞透露早前遭到公鹿保安故意刁難，對方甚至「唔當佢係一個籃球員」！
林書豪受訪時自爆東岸決賽Game 2作客公鹿後受辱經歷：「我嗰陣準備去隊巴，突然有個公鹿職員大聲喝我想去邊？我就話想返隊巴，但個保安唔信，叫我拎張通行證出嚟，而我根本冇呢啲證！」而林書豪承認曾在其他球場遇過類似情況。
事實上「J.Lin」季後賽上陣機會愈來愈少，東岸決賽對公鹿合共只曾落場5分鐘，不過總決賽對林書豪而言仍然甚有意義，皆因對手勇士正正是其NBA生涯第一間球會，不過他在2010-11年效力勇士期間的隊友，現時只剩下史堤芬居里一人。