上場踢出超水準、1比1遭傑志逼和的凱景，雖然提早三周篤定護級失敗，但今場作客將軍澳運動場鬥理文前，主帥「大頭文」馮凱文再次語重心長提醒旗下年輕球員，要為自身前途而戰！
（周日下午2時30分開賽）
宣告護級失敗後，「馮Sir」透露過不排除入信向足總申請留級，同時他亦再三提到「凱景申唔申請留級」乃一件事，「足總批唔批留級」屬另一件事，由於眼前充滿變數，他認為球員交出表現才是最實際：「上場波驚喜之下領先，領先之後大家打起信心，防守做得好好，成隊波都好集中。球員冇壓力放開懷抱踢，交出好表現。做到賽前我同佢哋講，要為自己去努力，有表現就無論凱景下季點，都仲會有其他選擇。最後一場會秉承球會宗旨繼續畀年輕球員上陣，亦都會畀一啲平時踢得少嘅球員上陣，盡力踢埋最後一場。」
至於今季「菁英盃」冠軍理文，據悉已展開新季組軍工作，惟未必所有球員都「有得留低」，為博取會方信任，加上去仗竟出乎人意慘吞夢想ＦＣ「6蛋」，今仗無論如何都會全力狙擊客軍。