米度列頓3分炮射爆塞爾特人
尋日ＮＢＡ季後賽，公鹿主場以123比102大破塞爾特人，喺東岸4強大戰總場數追成1比1平手。公鹿王牌「字母哥」安迪杜甘保攻入29分同10個籃板，不過真正殺到塞爾特人措手不及，其實係「奇兵」小前鋒米度列頓，佢嘅「3分炮」打到「綠軍」嗌救命！
公鹿今場奇招制敵，控衞比迪素成功封殺塞爾特人王牌艾榮，搞到對方全場18射4中只得9分；安迪杜甘保就繼續內線屈機，同一時間畀米度列頓有足夠時間同空間喺外圍發炮！繼Game1錄得三分球4射3中（75％）後，今場更多達10次起手，錄得7次命中（70％），全場交出28分。咪以為米度列頓只係呢兩場超水準，上季公鹿雖然喺季後賽首輪3比4輸畀塞爾特人，但米度列頓嘅三分球就曾經令「綠軍」吃盡苦頭，7場大戰三分球合共41射25中，命中率有61％，塞爾特人對住呢支長炮顯得束手無策，嚟緊幾場都要諗下計。
勇士再破火箭
同日西岸大戰，勇士主場再以115比109擊落火箭。勇士杜蘭特同火箭占士夏登同樣有29分，不過勇士火力勝在平均，史堤芬居里及奇利湯臣夾埋入咗41分，另外積蒙格連亦有15分及12個籃板，令勇士總場數領先至2比0。Game3輪到火箭主場，睇下可唔可以追番近啲。