on.cc東網直播智多星鬥法 佳聯元朗理文終極爭盃

佳聯元朗主教練郭嘉諾指出：「對手嘅兩位年輕球員余煒廉、鄭兆均我都熟悉，一直都相信兩位好有實力。今季好開心見到佢哋有好多出場機會、表現亦好好，當然『陳Sir』嘅功勞非常大。」

元朗今季以年輕球員掛帥，「郭Sir」揚言：「咁多年『菁英盃』賽事，其實元朗未贏過一場，呢班年輕球員係我哋培訓對象，佢哋全季付出咗好多，希望可以攞到『菁英盃』冠軍，去證明用年輕球員嘅方向係正確嘅。」

郭嘉諾：奇招練兵有成效

元朗早前曾受卡巴迪特訓，郭嘉諾大讚這項運動有助球員增強對抗性：「有一幕係盧梓杰（Billy）大戰法比奧，就咁睇身形會以為Billy一定輸，但係嗰次法比奧畀Billy撻落地，證明年輕球員面對強過自己嘅對手係無畏無懼。」球隊早前於Facebook募集千人打氣團，「郭Sir」冀能奪得今屆「菁英盃」冠軍，以答謝球迷一路以來的支持。

陳曉明：最要提防係郭Sir

理文主教練陳曉明則透露：「如果你問我元朗要小心邊個，我會話小心『郭Sir』，今季帶住一班年輕球員，球隊表現都好穩定，佢亦好了解我哋嘅年輕球員。另外，法比奧係舊年元朗攞銀牌冠軍好重要嘅一員，佢嘅經驗係我哋所缺乏，但我哋都希望將佢嘅作用減低。」

理文中場 史提芬彭利拿	佳聯元朗後衞 羅振庭	理文中場 顏樂楓

「陳Sir」又指對手上周聯賽輪空，備戰上有優勢，相反球隊上周在大雨滂沱下對陣香港飛馬，球員恢復為今周訓練重點。後衞余沛康上場聯賽補時階段領黃，累積5張黃牌，今仗需作壁上觀，「陳Sir」期望：「佢喺準決賽踢得好好又有入波，對佢嚟講都有啲打擊，我哋希望攞呢個冠軍送番畀佢。」至於前鋒梁嘉恆肯定缺陣，中場白智勳則可候命。

打氣Tee匙扣紀念大日子！

「菁英盃」決賽雙雄在宣傳及推廣都花盡心思，佳聯元朗球衣贊助商Kelme為今仗生產「特別版打氣Tee」，讓「橙軍」會方送給「Die Hard Fans」。至於球會史上首次躋身盃賽決賽的理文，同樣搞了不少「花臣」，凡球迷今天穿上、帶進場或現場購買的理文球衣，都可憑衫獲取免費印上對賽日期的機會一次。另理文會向入場球迷派發決賽海報一張，以及限量紀念鎖匙扣一個。數量有限，送完即止。

陳焌鏗報道