快艇客破勇士追番場
NBA季後賽昨日上演2場西岸首圈大戰，火箭憑住占士夏登攻入26分，主場100比93擊敗爵士，總場數贏4比1順利晉級4強，雖然各界預期火箭出線之後將會大戰勇士，不過呢場戲碼可唔可以出現仲有變數，事關勇士主場以121比129不敵快艇，總場數被追至3比2，快艇矮仔控衞比華利再一次成為贏波奇兵！
30歲嘅比華利多年嚟都係以超強防守能力見稱，統計數字上從來都唔見特別亮麗，偏偏今次季後賽就完全展示出個人特長，頭2場緊身招呼杜蘭特非常有效，上場緊纏史堤芬居里又令「咖喱仔」3分波9射得1中。今場生死戰比華利繼續奮力搏殺，得1米85嘅佢雖然係全場最矮，但就用努力搶到全場最高嘅14個籃板，加上佢最強武器3分波11射5中全場貢獻17分，所有數據都好靚仔。
快艇嘅路易斯威廉士交出33分同10次助攻，係球隊贏波另一功臣，不過勇士教練卡爾亦點名大讚比華利先係勝負關鍵：「比華利由一開波已經不斷踢我哋個屁股，比我哋任何人都更有能量，係呢場波嘅關鍵。」比華利喺最後1分40秒博到奇利湯臣進攻犯規，再一次用防守打爆勇士實在抵讚。
夏登名牌潮服賀晉級
反觀火箭就贏得較為輕鬆，射手艾歷哥頓同星級控衞「CP3」基斯保羅分別攻入15分，正選中鋒卡比拉亦有16分及10個籃板，不過搶眼度始終不及陣中球星占士夏登，「大鬍子」今仗場內Sharp醒交出26分之餘，場外着上一套價值5,000美元嘅名牌潮服，更輕易成為各界焦點，係咪咁有型？咁就見仁見智嘞？