勇士學精咗G3炒快艇
NBA西岸季後賽首圈，上場恥辱性畀快艇逆轉嘅勇士，尋日作客快艇一班「金鑽兵團」冇再輕敵玩嘢，全隊打得勁集中，結果憑杜蘭特勁入38分、4籃板及7助攻，勇士大炒132比105，總場數領先2比1。
西岸「1哥」勇士上仗領先31分下輸畀第8嘅快艇，創下NBA季後賽多項羞家紀錄，一班球星受到教訓，尋日打番出身價，首節就領先快艇41比24，命中率68%，當中史提芬居里單節入13分，拍檔杜蘭特更係「百發百中」。
馬刺喺主場淘「金」
杜蘭特上兩場因同比華利爭執而影響表現，飽受批評，今日佢終於「醒番」，開場已連續進攻頻頻得手，全場23投14中，埋單交出38分，季後賽嘅個人總得分已超越「魔術手」莊遜，進佔歷史第14位。至於「咖喱仔」則貢獻21分同5個籃板。下仗Game 4勇士繼續作客洛杉磯。
同日馬刺主場以118比108贏金塊，戴歷韋特轟出生涯季後賽個人新高嘅36分，隊友迪羅辛則獲25分，加埋艾迪列治18分及11個籃板「雙雙」，令到常規賽第7嘅馬刺總場數領先「2哥」金塊2比1。