富力R&F鬥凱景各懷目標
今日港超聯另一場賽事，爭標分子富力R&F在主場廣州燕子崗體育場擺下擂台，迎接榜尾凱景的挑戰。富力今仗如能全取3分，便可重登榜首之位；凱景如今日未能搶分成功，同時理文又擊敗香港飛馬的話，凱景便會提早兩輪宣布護級失敗。今日一戰雙方各懷目標，勢必出盡九牛二虎之力！（周六下午2時30分開賽）
兩軍主帥擔心天氣多啲
富力R&F主教練楊正光坦言，餘下每仗對爭標都極為關鍵，今仗「牌面」上雖佔盡優勢，但提醒球員不能輕敵：「凱景實力唔算好強，但佢哋贏過冠忠南區，對我哋嚟講係一個好好嘅警惕。另外近日天氣、場地情況對我哋嚟講都係困難嘅，球員一定要集中精神應付每一分鐘。」
自上場擊敗夢想FC後，富力相隔兩周再出戰，「楊Sir」明言不擔心球員狀態，反而是有助他們恢復元氣：「呢段時間正好畀我哋球員有休息時間，特別係有啲球員年紀比較大，點樣去保持或者提高佢哋最好嘅狀態好重要，所以有個Break對我哋嚟講，都係一件好事。」
凱景昨日揮軍北上，惟因惡劣天氣未能在比賽場地作賽前操練，訓練最終遷至球場旁邊的仿真草球場進行。球員雖未能提早適應場地，主教練馮凱文認為影響不大：「擔心都有少少，始終我哋未能落場練操，就要喺呢個球場作賽，我比較擔心球場積水同天氣，預測會落大雨，不過都冇辦法，天氣我哋控制唔到。」凱景今仗要面對聯賽火力最強的富力，「馮Sir」透露：「作客嚟到希望穩守先，首要目標不失球。」人腳方面，巴西外援羅拔刑滿復出，而南韓中場金珍曙則未有隨隊。
陳焌鏗廣州直擊