埋身肉搏出埋「撩陰腿」 火箭挫爵士先拔頭籌
尋日NBA季後賽西岸首圈，火箭主場迎戰爵士，占士夏登打出「準三雙」，交出29分、10次助攻及8個籃板，幫助球隊贏122比90，季後賽旗開得勝。雙方比數上雖然有距離，但賽事就充滿火藥味，火箭同爵士兩位「馬尾男」喺籃底「郁手郁腳」，甚至出埋「撩陰腿」踢對方下體！
比賽到第3節尾段，爵士嘅古特拿突圍上籃，火箭費列特籃底試圖封阻，兩人隨即發生肢體碰撞，古特拿被撞到跌地，費列特亦失重心，被勾跌連帶倒地，此時費列特隻腳差啲踢到古特拿「重要部位」，搞到古特拿勁不滿，迅速起身諗住「還拖」，好在其他球員及裁判及時制止，先避免衝突升級。
講番場波主場嘅火箭保持水準，除夏登錄「準3雙」外，基斯保羅貢獻14分及7次助攻，卡佩拉則做出「雙雙」嘅16分及12個籃板，另外替補上陣嘅豪斯職業生涯首場季後賽打得搶眼，上陣25分鐘11投4中，其中三分球10中3，係兩隊後備陣營中得分最高；反觀爵士命中率唔到4成，三分球27投僅得7中，成為輸波關鍵。
公鹿輕取活塞
另外據美國傳媒報道，東岸球隊活塞主將格芬可能會缺席首輪對公鹿的所有賽事，據報指佢左膝傷勢比想像中嚴重，而尋日格芬缺陣下，活塞作客就以86比121慘敗畀常規賽「1哥」公鹿。