整體戰較量！理文夢想FC鍊過
菁英盃今午於旺角大球場進行另一場4強大戰，由理文與夢想FC爭入決賽。理文主帥陳曉明表示，球隊上仗以0比0守和東方龍獅力保不失，希望藉此建立信心爭勝，夢想FC主教練梁志榮則明言，今仗雖有主力馬高斯停賽，但未有影響球員鬥志及信心，期望能夠殺入決賽！
「細榮」：壓力小隨時有驚喜
理文主教練陳曉明承認上仗傾向較保守的踢法，希望保持不失球，避免輸波令球員帶着負面情緒備戰今場4強大戰。「曉明Sir」亦指出︰「夢想相比起傑志、東方同大埔等對手，反而比較着重整體，呢樣對我哋較有利同較易應付，因為我哋都係傾向團隊合作，唔係依靠個人能力。之前對手有啲具質素嘅邊路球員，令球隊嘅華人閘衞比較吃力。今次大家嘅外援都係喺中路，年輕球員就喺邊路，兩隊波結構接近，反而令我哋防守方面更有信心。」
夢想FC上仗主場對富力R&F，西班牙中場馬高斯上半場尾段兩黃一紅被逐，終以1比5落敗，主教練梁志榮坦承對這位主力停賽始料不及，但仍對球隊充滿信心︰「上一場較少踢嘅球員表現唔錯，雖然從比數睇唔太好，但如果場波全場Keep住11人對11人，相信戰果會唔同。因為打少個，體力消耗快咗，先令對手有機會將比數擴大。」對於今次對壘，「細榮」表示︰「雙方都有常規嘅U22球員喺陣中，以呢個盃賽為目標都好正常。不過佢哋喺聯賽嘅班費同成績冇咁平衡，相信我哋係壓力冇咁大嘅一方，或有更佳演出。」