港超重燃戰火on.cc東網5:30pm直播 理文東方龍獅埋身肉搏

「中銀人壽香港超級聯賽」今午於將軍澳運動場重燃戰火,理文火併東方龍獅。理文自上月初於菁英盃擊敗傑志殺入4強後,近3仗均未能贏波,主教練陳曉明期望球員振作令球隊重返正軌。至於上場聯賽大炒凱景的東方龍獅,亦希望將勝利走勢延續。(on.cc東網周五下午5時30分直播)

理文上周在余煒廉及干沙利斯一對中堅停賽下,於足總盃以0比6不敵傑志,8強止步,主帥陳曉明坦承球隊有不足之處,不過認為賽果未能完全反映球員表現︰「上場冇咗兩個踢開嘅中堅,人腳上實有影響。去到下半場我哋都有兩次中楣,兩個機會只要有啲改變,成個形勢都可能唔同。失第3球後,佢哋因為想喺盃賽爭取入球,最終暴露太多空位畀傑志,先至再有失球,所以唔可以單從比數睇場波。」

陳曉明:球員積極面對敗仗

陳曉明又指出,球員雖在敗仗後面對着壓力及批評,但近幾日操練仍保持積極態度︰「球員唔會畀一場唔理想嘅賽果影響,都好集中去準備呢場波。」傷兵方面,上仗後備登場的梁嘉恆雖未傷愈,但仍有機會正選上陣。

作客的東方龍獅上月中旬以5比0大勝凱景,終止各項賽事8場不勝走勢,主教練安祖史杜錫認為:「我哋等咗呢場勝仗好耐,球員好有質素,只不過係要搵番勝利嘅感覺。不過,嗰場波喺防守上有地方做得唔好,所以我哋訓練時有針對改善呢個問題,如果我哋改善到,表現會更加好!」自該仗後,東方龍獅已逾兩周無戰事,「安帥」表示:「我哋有安排友賽,主要想睇吓球員喺唔同位置嘅表現,同時試吓唔同陣式、踢法,從而搵出球隊最強嘅一面。」

今仗面對理文,「安帥」表明要小心應付:「理文係一支具組織能力嘅球隊、有一班好有質素嘅球員,佢哋嘅踢法好有耐性,會觀察我哋喺球場上做啲咩,所以我哋要好好準備呢場波!」據悉,東方龍獅目前有洛迪古斯、麥基、劉浩霖、黃梓浩、徐德帥等傷兵,能否上陣仍是未知之數。