單季得分助攻同波神睇齊 夏登着金靴刷數據
球星繼續刷數據！繼韋斯布克日前食出3項20+的「超級大三元」後，昨日輪到前隊友「大鬍子」占士夏登發威，呢位將Step Back發揮得爐火純青的火箭當家球星特登換上特別版金靴，於周四的常規賽交出31分、7個籃板7次助攻，成為單季得分突破2,7000分及助攻超過500次嘅球星。
打到着火的占士夏登昨役發揮全面，加上好拍檔「CP3」基斯保羅交出9分及7次助攻，帶領火箭在第3節已大幅拉開比數下，以135比103擊敗主隊快艇，豪奪4連勝，繼續排名西岸第3。而比賽焦點當然落喺夏登身上，不停得分兼傳波助攻，令「大鬍子」成為史上第3位，於單季總得分突破2,700分（現累積至2,723分）並且總助攻突破500次嘅球星，過往能夠做到呢個數據，就僅有「波神」米高佐敦及名宿阿治波（Tiny Archibald）。
普帥開波63秒被逐
另外，西岸排名日日有變化，馬刺作客最終以85比113大敗金塊手下，如今跌落西岸第8，季後賽資格仍未明朗。馬刺點解遭逢大敗？因為主帥普波維治都玩「刷數據」，喺比賽僅開始僅63秒就同裁判發生爭拗，眼見呢位名帥咬住裁判唔肯收口，結果一下子連食2次技術犯規，閃電式被驅逐離場。值得一提係，呢位主帥3日前又係同裁判爭拗而被逐，不過今次櫈都未坐暖就被趕走，又真係前所未見。翻查資料，原來上一位最快被趕離場嘅教頭，要追溯到2012年，當時執教華盛頓巫師嘅桑達斯（Flip Saunders）喺比賽開始後2分鐘被逐。