20分+20籃板+21助攻 韋少食出超級大三元
韋斯布克食出「大三元」已經唔係乜嘢大新聞，不過呢位全能控衞喺周三上演嘅常規賽再創新猷，成為半世紀以來第1個交出「3個20」數據嘅NBA球員，帶領雷霆主場以119比103大勝湖人。歷史上只有傳奇球星張伯倫試過得到「3個20」嘅瘋狂數據，韋斯布克今次絕對名留青史！
同名宿張伯倫睇齊
韋斯布克今場一開波已經準備「刷數據」，單係第1節已經交出10次助攻，比賽去到最後1分鐘雖然大局已定，雷霆亦收起保羅佐治等幾位主力，不過韋斯布克依然喺場中搏命，點解？就係畀機會呢位球星刻下里程碑，最終韋斯布克亦冇令大家失望，喺最後41秒搶到防守籃板，亦係佢今場第20個籃板，完成使命後，「韋少」終於喺全場球迷掌聲歡送下返回後備席休息。埋單計韋斯布克今場得到20分、20個籃板及21次助攻，成為NBA有史以來第2個食出「超級大三元」嘅球員，抵佢賽後咁興奮！
上次食出「超級大三元」係名宿張伯倫，佢喺1968年就試過取得22分、25籃板同21助攻嘅驕人成績。