曼城今夏強勢訪港 7‧24大球場激戰傑志
曼城今夏展開亞洲之行，7月會先到中國踢英超亞洲盃，繼而會再次來港，同傑志於香港大球場踢表演賽！近年表現突出嘅曼城，現時正力爭歐洲4冠王，實力愈來愈強之餘，陣中仲星光熠熠，「藍月亮」將於7月21日抵港，之後喺24號激戰傑志，無論你係本地波、英超定曼城粉絲，都唔好錯過呢場賽事。
翻查歷史，曼城今次係第4度來港比賽，第一次係05年對戰南華，08年就大戰祖雲達斯，到2013年曼城同新特蘭、熱刺、南華齊齊爭英超亞洲盃，曼城順利打入決賽，於香港大球場「大爛地」擊敗新特蘭捧盃，相信香港球迷都記憶猶新。
曼城同傑志交手後，會繼續亞洲之行，7月27日到訪日本，同日職球會橫濱水手踢熱身賽。
英超官網意外爆 曼城今季封王?!
此外，英超聯賽會尋日宣布，曼城、紐卡素、韋斯咸同狼隊，將參加今夏於中國舉行嘅英超亞洲盃，2場4強會喺南京踢，決賽同3、4名之爭移師上海上演。官方表示，今次賽事係「首次有英超衞冕冠軍參加」，呢個盃喺7月舉行，莫非英超官網依家已知曼城到時會以「衞冕冠軍」身份參加？
根據英超官網資料，今次英超亞洲盃唔會喺香港舉行，而會分2個賽日，喺南京奧林匹克體育中心（7月17日）同上海虹口體育場（7月20日）進行比賽爭奪冠軍。英超官方Facebook中文版尋日宣布有關消息，其中「首次有英超衞冕冠軍參加」惹來本地網民關注，唔少球迷都話官方已欽點、內定曼城奪標，唔係點會話曼城係「衞冕冠軍」先？
翻查英超官網英文版，亦有相同字眼。有網民話，可能英超官方講嘅係「現階段衞冕冠軍」，咁上季的確係曼城攞冠軍，佢冇錯喎！再翻查對上8屆英超亞洲盃，分別於03至17，每隔2年於亞洲舉行，其中11、13及17年，都有09/10、11/12、15/16球季英超冠軍參加（順序為車路士、曼城及李斯特城），又點會係「首次有英超衞冕冠軍參加」？相反如果堅以「應屆冠軍」嘅條件去睇，就真係從來未試過。英超官方都講到出口，睇嚟曼城球迷可以預先慶祝喇！