後備龍門心態決定表現 李溢晉：要Fight低正選

作為球員，沒有人想長居後備。在後備席上，有人會選擇逃避，也有人選擇積極面對。顯然，Edward選擇了後者：「如果你係後生嘅後備門將，你嘅心態就要想爭，一定要Fight低正選龍門！我唔理邊個喺我前面，就算嗰個係『阿輝』（東方龍獅門將葉鴻輝），我都一定咁做，如果唔係咁諗，你唔會有好表現。如果你成日抱住冇得踢嘅心態，當有機會落場比賽嘅時候，你都唔會有好表現。做後備嘅職責，就係當正選踢唔到時，你一定要代替到佢，如果唔係點會有後備呢個位？我自己覺得係咁。」

頂替謝德謙表現穩健

冠忠南區3位門將謝德謙、蔡子濤，以致早前頂替「阿謙」的Edward，今季落場都能交出穩健表現。Edward指新守門員教練馬克能助球員建立信心：「喺訓練入面，教練唔會令你覺得自己差，『阿謙』一定有嘢好過我，我都一定有嘢好過『阿謙』，但我哋練波又唔會睇到有一個特別差，大家訓練時都做得好好，因此冇令自己失去信心。」他亦喜見「阿謙」有好表現：「龍門其實係一個團隊，我哋喺訓練上有咁嘅質素，落到場先可以發揮得好，呢樣嘢大家都有功勞，當然『阿謙』功勞會大啲，但係大家都好開心。」

李溢晉頂替謝德謙表現穩健。

冠忠南區守門員教練馬克（右）幫到球員建立信心。

去年Edward曾入選亞運初選名單，惟最終在決選名單榜上無名，他坦言：「少少失落一定有，但我已經將自己有嘅嘢畀晒教練睇。我覺得自己質素唔係差過人，只係上陣次數少啲。呢個亞運踢唔到唔緊要，始終都係青年賽事，如果遲啲喺大港腳攞番機會，我會更加開心，惟有自己再努力啲，希望爭大港腳機會！」

今季目標有牌落袋

至於球會方面的目標，他期望：「今季係最大機會，有得爭聯賽冠軍同足總盃，攞邊個盃都冇所謂，最希望係有個獎牌落袋。長遠就係睇吓有冇機會出去踢，雖然比較難，但都想試吓。」

同劉學銘夾到同遊寶島

從社交網站上，不時看見李溢晉與隊友劉學銘一同外出，Edward大爆：「我識咗佢應該有11年，好細個青年軍開始識到依家，佢係一個幾好夾嘅中堅。有樣嘢幾好笑，比賽期間我出嚟打波，佢次次都喺我前面，次次都撞到佢，佢真係慘！」

二人私交甚篤，早前更一起共度佳節：「聖誕嗰陣冇波踢，我想去旅行見吓台灣啲朋友，咁啱佢又得閒諗住搵個近啲嘅地方行吓，最後就一齊去咗台灣。」Edward還透露在台北旅遊時，主要以「Hea」為主，其次是一嘗當地美食。

Profile

•出生日期：1995年12月8日

•身高：1米80

•體重：71公斤

•位置：守門員

•曾效力球隊：東方龍獅、夢想駿其

•現效力球隊：冠忠南區

•球衣號碼：17

圖/文：陳焌鏗