拓荒者盧傑恐怖斷腳
波特蘭拓荒者喺周二進行嘅常規賽上演慘痛一役，雖然球隊加時以148比144力克到訪嘅籃網，不過勝仗代價極為沉重，王牌中鋒盧傑喺加時階段恐怖受傷，爭搶進攻籃板落地時左腳嚴重骨折，畫面相當駭人，一眾球員見狀亦露出恐慌神情，盧傑即時被擔架抬走送院治理，肯定有排抖，唔少NBA球星都喺社交網向盧傑送上祝福。
其實嚟到常規賽最後直路，能夠打入季後賽嘅球隊幾乎塵埃落定，所以近日都有唔少穩入季後賽嘅球隊，容許陣中主將缺陣「叉電」。不過今季喺西岸名列前茅嘅拓荒者依然搏命，星級控衞列拿特同中鋒盧傑兩大支柱為爭勝唔錫身，其中24歲、來自波斯尼亞嘅盧傑兩年前加盟後愈戰愈勇，今季錄得場均15.4分及10.3個籃板「雙雙」成績，而且偷波同封阻都場均超過1次，演出極之全能。
肯特送祝福
盧傑今次嚴重受傷當然冇人希望發生，但如今肯定大大削弱拓荒者喺季後賽嘅晉級機會，但對於拓荒者大前鋒肯特來說，勝利已並非一切：「見到好兄弟在場上嚴重受傷實在心痛，我只想回家為盧傑禱告。」