今年喺機緣巧合下嘗到職業足球嘅滋味，對於上年仍係中學生嘅我嚟講，變化真係好大，以前一個星期最多只係練3日，依家差不多要日日踢，最初真係唔太適應。好在我遇到一班好好嘅隊友，不斷支持同鼓勵我，有咩一齊笑一齊捱，令我好快就融入球隊。
嚟緊我希望可以繼續喺不同嘅人同事上學習，不斷進步，成為一位能夠獨當一面嘅球員，幫到球隊。另外，我想藉住今次嘅機會多謝我母校拔萃男書院，你哋對運動員嘅支持同包容令我可以喺讀書之餘，仍能喺足球上發展。此外，我亦想同屋企人、支持我嘅人（尤其係Little Monsters嘅一眾家長）講聲多謝，你哋每一句支持嘅說話，哪怕只係簡簡單單嘅一句加油，已經係我喺球場上最大嘅動力，冇你哋無條件嘅支持，唔會有今日嘅孫銘謙。
跟住呢幾句，係同凱景一班隊友講嘅，我真係好開心可以同到你哋做隊友，你哋係我每朝早九點半去到九龍灣練波嘅動力，無論依家條路有幾難行，我相信只要我哋成隊波一條心，一定可以闖得過！
凱景球員 孫銘謙