前利物浦中場球星麥阿里士打，上周六同老婆於英國里茲街頭遇襲，等的士期間疑與人發生爭執，結果被拳打腳踢，面部嚴重受傷即時被送入醫院，上唇位置起碼要縫12至15針！呢名54歲好波之人係紅軍01年盃賽5冠王核心成員，上周六入晏菲路睇利物浦對ＡＣ米蘭嘅慈善賽後返回里茲，不單自己受襲，連老婆都於打鬥中整傷手腕，留醫到凌晨3點先出院，認真慘情。