勇士入埋季後賽

古辛斯達成心願

杜蘭特最快要下場對馬刺先可以復出，但勇士勝在球星多，除咗有「咖喱仔」擔大旗外，古辛斯近期表現亦搶鏡，今場就為球隊貢獻咗12分。勇士面對勁敵雷霆，自動波啟動「季後賽模式」，開賽冇耐打出一輪15比5攻勢，史提芬居里全場射入33分同攞到7個籃板，生涯總分攻入「16,000+」，成為勇士史上第5個突破萬六分大關嘅球員；反觀雷霆主將韋斯布克就勁失準，16投僅得2中，全場只有可憐嘅7分，另有9次助攻及8個籃板，隊友保羅佐治則貢獻「雙雙」29分及13個籃板，可惜都係阻止唔到勇士贏波。

勇士贏埋今仗，戰績改寫為47勝21負，繼續壓住金塊做西岸「1哥」，同時繼公鹿及速龍後，成為第3支鎖定季後賽席位的球隊。值得一提係今季加盟嘅古辛斯迎來個人生涯首個季後賽之旅，上季佢本來有機會隨塘鵝出戰季後賽，卻因跟腱受傷而缺席Playoff，今次可謂得償所願。

勇士下場對手馬刺喺主場以108比103贏拓荒者，拓荒者嘅列拿特雖獲全場最高34分，但主隊贏在平均，迪羅辛交出21分及8個籃板，加上另外6位隊友得分雙位數，馬刺順利實現8連勝，可以話係聯盟近期最弗球隊。