射又得！交又得！夏登做火箭助攻王
賽前失落MVP排行榜「1哥」位置嘅占士夏登，尋日帶領火箭主場以107比91擊敗76人，錄得今季最高嘅7連勝。夏登交出「雙雙」31分、10籃板及7次助攻，用行動向公眾證明佢嘅價值。
最新公布嘅MVP排行榜，公鹿「字母哥」安迪杜甘普壓住夏登做1哥，夏登今場即用表現反擊，得分之餘更有助攻，生涯為火箭總助攻數達4,073次，追平名宿梅菲紀錄，成為火箭搬到休斯頓以來總助攻數最多球員。火箭贏波後重返西岸三甲，更重要喺近排嘅魔鬼賽程中，先三殺勇士，跟手上周連挫塞爾特人、速龍及76人3支東岸勁旅，睇嚟已經為季後賽做好準備。
同日西岸榜首大戰，勇士主場以122比105輕取「2哥」金塊，奇利湯臣復出令球隊注入動力，全場射入9個三分球獲39分，令勇士堅守西岸首位。