孖寶發威雷霆贏波止血
陷入連敗困局嘅雷霆尋日作客對拓荒者終於反彈，兩大主將韋斯布克同保羅佐治攜手轟入69分，幫球隊加時贏129比121，拓荒者嘅列拿特攻入全場最高51分亦無補於事，雷霆贏波後重返西岸第3位。
潮韋PG夾埋入69分
今場對雙方嚟講都好重要，所以開波已極速入局，分數你追我趕，上半場拓荒者以61比58稍為領先，之後兩隊比分一直咬得勁緊，最後一節雷霆憑保羅佐治連投帶罰嘅得分，本以為可以拉開差距，點知拓荒者打出一輪10比2攻勢，反超前97比96，戰況緊湊亦令兩隊球員打出火，拓荒者列拿特投籃唔中，盧傑搶籃板時同保羅佐治發生衝突兼郁手，裁判吹罰兩人技術犯規，盧傑亦因累積兩次犯規直接被逐離場，最終雙方113平手完場要加時。「潮韋」韋斯布克關鍵時刻愈戰愈勇，個人全場怒轟37分，拍檔「PG」保羅佐治則貢獻「雙雙」嘅32分及14籃板，夾手夾腳協助雷霆走出谷底。