打吡失威湖人迷高呼高比

勒邦占士落場42分鐘19射9中，交出27分、8籃板同6助攻，數字唔算太差，但關鍵時刻第4節就頻頻失手。至於朗度亦拎到湖人生涯首次「3雙」24分、10籃板同12助攻，可惜尾段依然畀快艇甩開，主場球迷梗係極度失望！

輸埋今場，湖人由2月起到依家錄得3勝9負差劣走勢，家陣距離第8位嘅馬刺有成5.5場勝差，同死敵快艇更加相差6場。由於湖人今季鬥快艇戰績係1勝2負，令佢哋就算喺剩番18場常規賽可以追番6場勝差，都唔會騎得住快艇，有傳媒批死湖人季後賽無望！事實上湖人球迷講出想高比回歸嘅心聲，就係鍾意佢永不放棄，依家球隊好似未打先輸，球迷點會唔心痛吖！