台灣第一圍棋女神黑嘉嘉，剛於日本參加「扇興盃世界女子圍棋最強戰」，經過五日激戰，嘉嘉最終取得季軍，奪得200萬日圓（約14萬港元）獎金。嘉嘉因為靚得嚟極具氣質，混身散發仙氣，今個賽事每逢出場都成為日本網上熱搜榜冠軍，並被日媒封為「千年僅一人的美女棋士」。
黑嘉嘉於澳洲出世，係台灣同澳洲混血兒，五官靚到好似雕出嚟一樣，嗰份仙氣勁過初出道嘅張栢芝，仲因為由細到大都鍾意捉棋，所以擁有文靜靈巧氣質。日本人好鍾意嘉嘉，今次佢去到當地參賽得到極大注意，更獲邀請同日本9歲天才棋手仲邑堇進行友誼賽，佢得到季軍後咁講：「滿意呢次比賽表現，覺得好榮幸，諗唔到喺日本咁多人關注我。」
24歲嘅黑嘉嘉，6歲學棋、14歲成為職業棋士，佢人生大部分時間都係捉棋，所以未有戀愛經驗，嘉嘉表示：「我一直都唔覺得需要拍拖，但近期連爸爸都問我幾時談戀愛，所以都認為係時候了。」問到擇偶條件，佢就咁話：「我鍾意脾氣好、有幽默感嘅男生，高度同靚唔靚仔唔重要，同我傾得埋就可以。最好似我爸爸咁，係個好男人。」