梅拿自爆差啲入魔
作為東網嘅特派專員，除咗同馬圖斯等名宿做訪問之餘，當然要同一班拜仁慕尼黑嘅現役球星傾吓偈喇！喺安聯球場參觀完博物館，睇埋場好波之後，會方就安排咗一次「秘密會面」。甘美治同湯馬士梅拿前後腳進場，但出名搞笑生鬼嘅梅拿傾傾吓偈，就突然邀請在場嘅南韓記者一齊跳「江南STYLE」嘅騎馬舞，佢跳得興起，仲話：「只要配上音樂，上載到社交網絡，一定會紅遍全球！」既然梅拿你開到聲，就等奧斯卡幫你手喇，大家記住上東網，去「睇體 ontv sport」重溫梅拿同甘美治記招嘅精華喇！
恩師尹戈爾招手 拜仁唔放人
入得房做「閉門記招」，梗係唔會齋跳舞咁簡單！問到身為德國人嘅梅拿，係咪唔願意離開德甲，佢就反問：「點解唔得？因為我唔識游水？」不過佢突然變得好認真咁話，原來曼聯曾經出價1億歐元（約9億港元）搶人：「尹戈爾係當時曼聯嘅主帥，佢對我嚟講有特別嘅感情，因為佢喺我人生第一個一隊教練。」最終拜仁決定企硬，多多錢都唔放人。
依家睇番，好彩當年梅拿無走到，尹戈爾最後敗走紅魔鬼，佢過咗曼聯，就少咗幾個德甲冠軍喇！