火箭「3殺」勇士

占士夏登因為感冒加上頸傷，今場大戰前宣布掛免戰牌，不過火箭另一主將基斯保羅就打出代表作，攻入23分兼交出17次助攻，代替占士夏登嘅艾歷哥頓亦有25分進帳，勇士全場不斷出現失誤，令火箭成功贏波。

火箭上年11月曾主場大炒勇士107比86，今年1月作客打到加時險勝135比134，今場再次擊倒呢支大敵。自從卡爾嘅「勇士王朝」出現後，火箭係第2支單季常規賽入面「3殺」勇士嘅球隊（另一支係17/18球季爵士）。

另一場湖人作客塘鵝，勒邦占士因被傳慫恿對方嘅安東尼戴維斯「作反」要求轉會，全場受到主場球迷噓聲招呼，勒邦占士即使拎到27分同12次助攻，但湖人仍以115比128不敵塘鵝。