東網直播踩油‧衝冠

冠忠南區狙擊理文

上仗作客以4比1反勝東方龍獅的冠忠南區，主教練鄭兆聰（Ricky）認為球隊仍有改善空間，但亦不忘稱讚隊員的把握力︰「我覺得成場波嘅表現可以好啲，畢竟我哋喺比賽初段未能入局，呢方面有檢討過。上場踢咗25分鐘後，球隊防守專注咗，冇畀東方龍獅太多空位，加上我哋嘅埋門好有威脅，亦能夠把握機會將皮球擺入網，係一場好重要嘅勝利。」

鄭兆聰要發揮主場威力

冠忠南區餘下7場聯賽有5場於主場作賽，Ricky期望能發揮主場威力，但同時不會忽視對手︰「我哋知道理文需要一場勝利，鬥志好強，所以我哋要好小心應付呢場波，唔好畀到機會佢哋。」傷兵方面，經已復操的高美斯及迪亞高，將按康復進度決定兩人上陣時間。

作客的理文上仗以1比3不敵富力R&F，主教練陳曉明認為球員搏命，惟細節、個人能力不及對手致敗。今仗為今季第3度面對冠忠南區，此前對賽錄得1和1負，「陳Sir」期望：「對南區打咗兩場，比數上顯示到大家實力都好接近，聯賽我哋剩番7場波，依家對番啲實力接近嘅球隊，每一分都好重要！理文欠缺一場精彩勝仗，令外界對我哋有番信心，希望呢場係啦！」

理文小志強 方栢倫（藍白間衫）	香港飛馬陳7 陳肇麒	傑志左腳王 費蘭度

然而，「陳Sir」透露球隊正受傷兵潮影響：「史提芬彭利拿有傷，今個禮拜都唔係好練到波，尼迪利都係呢兩日先復操，白智勳又唔舒服，梁嘉恆就有待觀察。雖然多傷兵，但係我哋好多華人球員都Ready，希望展示到辛苦訓練嘅成果同信心。」

香港飛馬硬撼傑志

主場出擊的香港飛馬近期走勢回勇，連同菁英盃分組賽擊敗傑志，已取得3連勝。今仗面對同得18分的傑志，主教練陳浩然認為：「每次對傑志都好難踢，我哋之前喺菁英盃贏過佢哋，無論信心、士氣都好好，上場對凱景亦做到零失球，防守信心都有加強。」「陳Sir」又謂今場比賽初段相當關鍵，要避免先失球。

陳浩然：Ready迎接連場硬仗

至於早前傷出的艾華、佐佐木周及胡晉銘，「陳Sir」透露：「佢哋都可以落場，但係狀態未係十足，加上嚟緊要再對東方龍獅同和富大埔，所以我哋會針對唔同對手嘅防守，調配球員踢唔同嘅比賽。」「陳Sir」又指上場對凱景首次上陣的袁振昇、曾至孝現在已相當清楚球隊要求，又已適應踢法，有助調動迎接連場硬仗。

傑志上仗作客以0比3不敵和富大埔，主教練朱志光表示除有球員倦勤之外，埋門是最大問題︰「我哋之前作客馬來西亞踢咗120分鐘，體能點都有影響，對和富大埔其實都處理得唔錯，不過上半場太早失守。睇番片段，球員算做得好好，只係埋門把握爭啲，22次射門只得2次中目標，對手唔計12碼8次埋門入咗2球。」

對於爭標形勢，「朱Sir」認為目前仍存在很大變數，因此期望在餘下7輪賽事爭取最多分數。人腳方面，除列斯奧養傷，艾里奧上仗因拉傷大腿退下火線，估計將缺陣3至4周，林恩許則受恥骨傷患困擾，需要休戰多一周。