費蘭尼77.77%踢賀歲盃

今屆賀歲盃除有費蘭度托利斯及加斯安奴柏利等球星來港外，賽會昨日公布最新消息，透露山東魯能正為盛傳從曼聯來投的費蘭尼申請工作證，意味轉會交易有望於日內完成。賽會表示，山東魯能前日開始詢問可否在來港名單中增添一位新球員，直至昨日早上，會方開始遞交球員證件資料辦理工作證手續時，從而證實該球員為費蘭尼。

魯能方面透露，球會希望費蘭尼能夠趕往廣州集訓，並且來港獻技，相信於今日可以確定這位比利時中場能否參與賀歲盃，主辦單位更指費蘭尼來港的機會高達「77.77%」！

陳肇麒打中堅守費托？成事嘅話堅有睇頭喎！	費蘭尼	佐佐木周

奇雲邦特制敵：簡單就掂！

至於早前公布26人名單的「香港賀歲盃選手隊」，昨日首課操練除了富力R&F及理文因需要備戰菁英盃，未有派球員出席外，球隊亦有人腳調動，由袁振昇及方栢倫頂替受傷退隊的盧卡斯與史必。雖然球隊未能「夫添」開操，主教練奇雲邦特卻表明希望以簡單的踢法迎敵，並對奪冠存有一定信心。

奇雲邦特說︰「球隊有唔少球員第一次合作，我哋只有好短時間備戰，但都會嘗試合力按照計劃執行，只要部署唔太複雜，就有機會贏波！我哋會嘗試話畀球員知，一切都唔係太困難。始終時間有限，大家亦需要互相了解，雖然會係一個挑戰，但係呢個係一個好嘅挑戰同埋體驗，對我嚟講係執教上嘅考驗，不斷鼓勵球員亦都係重點，保持正面係好關鍵。」

效力熱刺時曾擔任領隊哈利列納副手的奇雲邦特，亦對費蘭度托利斯給予高度評價，但就笑言希望對方不再處於巔峰狀態，至於會否安排陳肇麒擔任中堅，他就表示仍需跟「陳7」傾談再作決定。

袁振昇獲補選：踢1分鐘都搏盡

盧卡斯因傷退隊，獲補選參加今屆賀歲盃的袁振昇，昨午亦有出席首課操練。袁振昇和佐佐木周兩位首次出戰賀歲盃的球員齊聲揚言：「希望透過賽事表現自己！」

香港飛馬前鋒袁振昇受訪時難掩興奮：「其實我都係今日（昨日）先知自己獲補選，好開心，因為我係第一次入選，亦係第一次對海外球隊。希望把握今次機會，因為飛馬兩場菁英盃我都出唔到場，依家希望可以踢多啲，盡量融入球隊，多謝『陳Sir』（陳浩然）同奇雲邦特補選我。」

佐佐木周要威畀同鄉睇

他亦期望能趁機表現自己：「平常心啦，因為都有好多好有質素、實力強嘅外援，希望訓練時畀教練睇到我嘅能力，無論踢1分鐘又好、10分鐘又好，都希望踢出自己水準。」

同樣首次參與賀歲盃的日援佐佐木周則表示：「今次係我第一次對日職球隊，我好興奮，可以同費蘭度托利斯比併係一個好好嘅交流，佢係世界上其中一個最出色嘅球員，我希望透過比賽向佢偷師。」他又揚言：「希望有多啲上陣機會，我會爭取入球，話畀日本人知我做到啲咩！」

賽事資料

2月5日（年初一）

下午4時 山東魯能 VS 奧克蘭城FC

晚上6時15分 香港賀歲盃選手隊 VS 鳥棲砂岩

2月7日（年初三）

下午4時 季軍戰

晚上6時15分 冠軍戰

地點：香港大球場

賽制：若90分鐘內打成平手，會即時互射12碼分勝負。

兩日套票價格：$480(劃位)、$280(非劃位)、$180(學生及長者)

門票於城市售票網發售

圖/文：何彥霆、陳焌鏗