佳聯元朗和富大埔豬年搶頭彩
大年初六菁英盃搶閘上演！今日菁英盃會進行3場分組賽，其中A組在元朗大球場爆發「地區打吡」，由佳聯元朗火併和富大埔，兩軍過往交手例必飛沙劈石，今仗更是出線關鍵戰，激戰難免，同組「1哥」夢想FC則在尾場迎擊東方龍獅。至於頭場為B組賽事，凱景假斧山道運動場迎戰理文。
佳聯元朗及和富大埔目前在A組同得3分，元朗憑得失球較佳排第3，由於同組「1哥」夢想FC有機會在今個賽日鎖定出線資格，故兩軍要爭取另一個晉級席位，今仗3分甚為關鍵。對此，元朗主教練郭嘉諾希望球員在防守上有所改善︰「我哋同大埔有啲格食格感覺，今季兩場聯賽交手合共入咗6球，亦失咗6球，都係贏唔到，所以今場我想我哋會先做好防守，唔想再出現大手交易啦！」現時元朗除葉子俊及卡立正在養傷外，葉嘉宇及陳柏衡均有微傷，羅振庭則因病缺操，不過「郭Sir」指慕沙及基爾頓上仗表現出色，力足同大埔周旋到底。
辛祖完成註冊有望披甲
和富大埔日前落實簽入辛祖，主教練李志堅指這位港腳已完成註冊，今仗可隨時侯命。「堅Sir」透露，雖然辛祖狀態未足，但此子隨時是球隊爭標的重要棋子︰「球隊嚟緊連場大戰，中間仲有亞協盃要踢，辛祖以本地球員嘅身份加盟，令隊波有多啲變動，可以話係球隊最後一塊拼圖！」牌面上，和富大埔今仗至少要有分落袋才可保住出線希望，惟考慮到最後一輪要惡鬥富力R&F，而且賽期與亞協盃外圍賽附加賽相近，若未能改期遷就的話，在安排上會十分吃力，因此「堅Sir」明言要攞足3分︰「希望呢場可以贏波，但都想平衡番，畀一啲較少上陣嘅球員踢。」
