林俊生：戒唔甩嗰鋪癮

林俊生對足球的熱愛，他自己甚至用「癮」來形容︰「始終都係因為嗰鋪癮！喺我生命中，嚴格嚟講唔可以缺少足球，由細到大最鍾意都係踢波。一個禮拜唔踢就頂唔順，難得有機會咪試吓囉，點知一試就成功咗，算係叫做成功追夢！當年因為傷患好無奈咁退落嚟，咁依家都康復得七七八八，想睇吓自己可唔可以打番職業聯賽。其實我本身喺廣州富力預備組度練，後尾就轉介我過嚟港超呢隊，『楊Sir』（楊正光）覺得我仲可以，就畀咗呢個機會我。」

前隊友楊正光執教唔偏私

相比起當年港甲，林俊生認為現在港超除了比從前較多入籍兵外，比賽整體對抗性及節奏都比以前強烈。至於昔日效力天水圍飛馬時並肩作戰的楊正光，現在成為自己的教練，「阿生」強調兩人會公私分明︰「其實感覺都幾搞笑，以前係隊友，依家就做咗我教練，佢作為教練，我要尊重佢，唔會好似以前做球員咁嘻嘻哈哈、攬頭攬頸。我唔想因為某啲所謂嘅關係，令人哋覺得難處理或選擇，所以我會更加投入去訓練，付出更多努力爭取機會。」

或許林俊生在球隊輩分較高，但他謙稱自己不是「指導隊友」，而是以「過來人」身份與隊友交流意見，反而從事青訓工作，就讓他有另一種滿足感︰「我一直都有兼顧管理青訓嘅工作，安排其他教練去帶波。依家我因為踢緊波教唔到，但假如唔再踢，我都會教番，因為之前試過將一班o靚仔喺兩年間由零基礎教到識踢，之後再教到佢哋踢得精，過程令我好滿足，好有成功感。」

剛年滿34歲的「阿生」，或許正正因為職業生涯接近尾聲，令他可以放鬆並珍惜在場上得來不易的機會︰「其實都冇定太大目標，順其自然，盡力去踢，去享受足球，最緊要係過程中我係投入就OK，結果係點我唔介意。」