港足衞冕主場攻

第41屆省港盃足球賽,今晚8時假香港大球場上演次回合賽事,衞冕的港隊首回合作客輸1比2,在賽事不設作客入球優惠下,港隊主教練郭嘉諾表示,每一個入球都對球隊非常重要,並揚言會以積極進攻的踢法爭勝。(Now 633及ViuTV96台周三晚8時直播)

對於首回合憑林樂勤於補時階段禁區外笠入世界波,將比數拉近至1比2,港隊主教練郭嘉諾認為,除了令球隊士氣大振外,更重要是令球迷對捧盃存有希望︰「首回合末段都想球員放膽去攻,因為每一球都好緊要,尤其林樂勤落場時好想佢多啲起腳,最後成功入到波,好多謝呢班球員令香港球迷喺次回合有希望,希望多啲球迷入場支持佢哋。」

郭Sir:陳廣豪係長程炮

「郭Sir」亦希望港隊年輕球員養成主場積極進攻的習慣︰「我哋今場會比較進取,明白如果先失波的話,形勢就會好惡劣,但係呢班球員都要習慣喺主場賽事放膽進攻,所以我哋會由比較進取嘅陣式開始,希望盡快拎到第1個入球,從而搵到第2個入球。」

首回合因傷缺陣的鄭展龍,以及在賽事中受傷的陳廣豪今仗有望復出,「郭Sir」期望後者能夠在賽事中發揮作用︰「今場希望『廣豪』擔當一個重要嘅角色,尤其佢喺聯賽有好多波來自遠射,次回合需要多啲射門,我希望佢提供多啲遠射。」至於上場傷出的門將謝家榮因需要更多時間休息,昨日缺席操練,今早再作體能測試才決定能否上陣。

廣東隊主教練陳玉良表示,陣中不少球員完成內地聯賽賽季及來港舟車勞頓,都感到有點疲累,但他深信球隊上下經過適當的恢復調整後,仍能以最佳狀態應付次回合︰「首回合主場以2比1取勝,次回合作客目標好明確,全體球員以最佳精神狀態作賽,以報答球迷對我哋嘅支持。」

圖/文:何彥霆、陳焌鏗