富力奪分組賽首捷！

與月初雙方於港超交手時比較，今仗富力R&F幾乎清一色以「大冧巴」後生仔為骨幹，配合福保羅及沙沙應戰，雖然佳聯元朗也起用不少年輕球員，但仍有杜馬思、基斯及慕沙3位外援壓陣，不過，富力一班後生仔大打爭氣波，於16分鐘，富力袁振昇把握元朗門將葉嘉宇失誤，推入禁區近門破網，射入其今季首個士哥，並為富力打破僵局。落後的元朗不斷尋找機會反撲，於29分鐘，巴西外援慕沙近門頭槌頂入，為元朗追成1比1。

換邊後，雙方繼續搏錘，戰至70分鐘，富力得罰球機會，羅港威傳中雖被對手解圍，但仍有李卓翰大腳抽入，取得職業生涯首個入球，為富力領先2比1。失波後元朗仍未放棄，惟未能扭轉敗局，最終富力以2比1險勝元朗，取得分組賽首場勝仗，並以4分升上榜首。

楊正光大讚「有驚喜」

賽後富力R&F主教練楊正光坦言感到驚喜：「李卓翰位置上係防守多嘅，呢球波對佢有好重大意義，上一場對東方，佢都表現得非常好，今場係更加好。」他並透露中場陳俊樂是否1月回廣州富力需等待通知，中堅梁諾恆則留效至球季完結，「光Sir」期望球隊能早日與「細佬」續約。

佳聯元朗主教練郭嘉諾則指，球隊在下半場已控制戰局，可惜欠運未能增添入球。對於富力贏波功臣李卓翰，郭Sir透露︰「李卓翰喺香港隊時我都有一直教佢，完場後我都有過去恭喜佢，因為嗰球真係射得好靚！」