東方龍獅3子Young得有大志
為配合球隊長遠發展，港超勁旅東方龍獅今季除留用20歲中場茹子楠外，還從預備組提拔王力威，以及邀得上季效力冠忠南區的中堅陳靜謙。3位小將不時在訓練後加操，有潛質、有鬥心、有大志，關心香港足球未來嘅你哋，一定要留意！
「牛丸」早有心栽培陳靜謙潛力中堅
上季效力冠忠南區的20歲中堅陳靜謙（Matthew），今季選擇加盟東方龍獅全因主教練「牛丸」陳婉婷：「上季完季後，佢打電話問我有冇興趣過東方，之前踢U16嗰陣，佢都問過我過唔過飛馬跟佢，但嗰時我冇去到。雖然我同佢識咗好耐，但今季係我同佢第一次合作。」
去季曾在菁英盃亮相的Matthew，認為自己有進步空間：「第一場正選對傑志，會覺得Nothing to lose，自己冇咁大壓力，亦都投入去踢。但到第二場對飛馬後備上陣，球隊落後緊，自己心情就緊張。」由於荷西安祖收咧，東方龍獅中堅捉襟見肘，問到Matthew會否因而有望得到更多上陣機會時，人如其名的他謙虛地說：「我想落場，但知自己有不足嘅地方，中堅呢個位置好重要，唔可以犯錯，所以我覺得應該繼續裝備好自己先，一有機會就可以好好把握。」
孝順仔王力威着「77」More型
年僅18歲的王力威（Naveed）早前於菁英盃後備上陣，完成自己職業生涯首場比賽，他憶起該仗時坦言緊張：「我喺後備席時已經好緊張，隊友鼓勵我，叫我去享受場比賽。特別係林嘉緯，佢同我講：『我對你有信心！』令我之後落到場都有自信。」投身職業足球，對這位小伙子來說，更是別具意義：「屋企得我爸爸返工賺錢，佢好辛苦，我依家踢職業足球，除咗做自己鍾意嘅嘢之外，仲可以幫輕佢。」這位巴基斯坦裔翼鋒希望今季能夠取得入球，並展示自己特別的慶祝方式。球迷們，即管拭目以待！
Naveed職業生涯首件球衣選擇了77號，原來是因為他在1月7日生日，但球隊的7號、17號分別由徐德帥、李康廉披上，Naveed最後選擇了77號，而非青年軍時期的27號，全因：「More型呀！」Naveed以半鹹半淡的廣東話說道。
踏實唔博出名茹子楠人如其髮
3位球員當中，最受注目的一定是上季已嶄露頭角的「魚子」茹子楠。「魚子」今季獲得港隊主教練韋特徵召，並在友賽作客印尼一戰獲後備上陣，他坦言所有事情來得突然，名氣雖帶來壓力，但仍謙虛地說：「其實我唔係想出名，只係想為自己夢想奮鬥。」在負笈英倫時，茹子楠曾到當時的英超球會史雲斯試訓，期間曾與湯卡路爾一同操練，「魚子」大讚這位英格蘭中場專業，希望自己如他一樣，能在比賽中帶領球隊。問及「魚子」的長遠目標時，他謂：「希望衝出香港，加盟其他亞洲球會！」
茹子楠的髮型或沒有其他隊友時髦，但卻成為其標記，閒時還會被朋友取笑說：「成廿年都係呢個頭！」不過，他並沒有介懷，還甜笑說：「我自己唔係幾注重形象，所以呢個頭平時係女朋友幫我剪，幾好呀，又唔使錢。」
34 陳靜謙 Profile
出生日期：1998年4月18日
身高：1米82
體重：69公斤
位置：中場、後衞
球員號碼：34
42 茹子楠 Profile
出生日期：1998年5月12日
身高：1米68
體重：60公斤
位置：中場
球員號碼：42
77 王力威 Profile
出生日期：2000年1月7日
身高：1米80
體重：61公斤
位置：翼鋒
球員號碼：77
圖/文：陳焌鏗