陳兆榮回歸蓄銳大爆發 香港東方勢兇夾狼
「由起床一刻你只有一樣工作要做，就是要進步，每一天都要。」NBA木狼球星戴歷羅斯經歷無數傷患仍轟入職業生涯最高50分，不是偶然；去年10月左膝十字韌帶斷裂，令陳兆榮錯過上季整季ABL賽事，但他沒有停下來，不斷的復健、加操，最終和羅斯一樣變得更強。今季「兆榮」克服傷患強勢回歸香港東方，回到東南亞職業籃球聯賽（ABL）戰線，今晚首戰作客珠海斗門體育館大戰澳門戰狼（前身為珠海戰狼），目標只有一個：「唔會放過任何得分機會！」
「最辛苦係等待！抖咗起碼9至10個月先可以打波，呢段時間惟有努力復健。」受傷不能打球，並沒有令陳兆榮像動漫《Slam Dunk》主角之一三井壽咁放棄自己，在板凳的這段時間，更與球隊連成一線：「雖然上季（聯賽）9成9比賽都唔關我事，臨尾都係幫到幾多得幾多。最後東方贏到本地甲一聯賽冠軍，我為整個團隊感到開心，證明佢哋嘅努力冇白費。事實上，東方上季喺防守上由季初至季尾已經有好大分別，依家大家會一齊壓迫，進攻決定亦做得更好，唔會好似以前咁過份依賴一、兩個球員。」
堅持苦練日日進步
今年是陳兆榮第3年作為全職籃球員，面對日覆日的訓練，各種辛苦現在只是一種「感覺」，不會阻止他向前：「日日都對住籃球可能會悶，但依家我會喺悶嘅時候再搵突破。邊方面做得唔好，就再做好少少，我想籃球上、生活上都更有規律，令自己進步得更多。」
傷後復出的「兆榮」亦變得更積極：「平時10點至2點球隊訓練，但我通常會9點到球場，自己先做一啲運球、射波練習。另外每個星期會有3日早少少起身，朝早6點半去到旺角健身到7點半，跟住揸車去元朗練波。真係攰o架，但要堅持。」很多事一旦習慣了之後，就絕不是甚麼難事，甚至說得上容易，只要把腦袋和身體的連結切斷就好。
全能控衞目標捧盃
上周的港澳埠際賽，久別港隊的陳兆榮在第3節甫落場即連入3個三分球，全場轟入5球共得15分，協助香港以97比66大勝澳門。「嘩！兆榮返嚟喇！」連現場球迷都不禁驚嘆。今年ABL外援名額減少，令本地球員獲得更多上陣時間，回復狀態的「兆榮」表示興奮又期待：「本地球員有更多機會同上陣時間當然係好事，落場對位甚至會遇上外援對手，好期待呢件事發生。」今季「兆榮」為自己定下目標，要做一個「全能控衞」：「除咗分波，我唔會放過自己上籃或者任何得分嘅機會，希望侵略性大啲，盡量幫球隊搶分。今季ABL我哋以冠軍為終極目標，我就希望先穩入4強再慢慢打。」（有線601、661台周五晚7時45分直播）
余樂詩珠海直擊