豁達蔡尚圻：世界需要有人種樹

雖然和富大埔上季分別在港超聯、足總盃及菁英盃僅次傑志而屈居亞軍，但Gary認為球會已漸入正軌︰「上年季初時，我哋會唔會覺得呢3項賽事都有機會爭第1？所以其實成績已超乎我哋嘅目標。我接手大埔後有個幾年嘅計劃，第一年入主大埔，要各方面取得平衡，無論球員同管理層都要磨合。第二年希望爭取到一啲成績，但係人腳同板櫈深度唔夠。去到第三年，對成績有更高要求，或者挑戰亞洲賽，雖然上季3個亞軍唔可以話係最滿意嘅結果，不過收貨囉！」

將心比己為球員着想

不少球隊取得不俗成績的同時，隊中主力被挖角往往就是接下來要面對的問題，對於陳俊樂及謝家強等人今夏先後離隊，Gary認為要替球員着想和高興︰「譬如球員有機會踢中超，俗啲講句就係『唔好阻人發達』啦！你應該祝福佢，而唔係怨佢走，天下無不散筵席，最重要都係為球員好。講真一個球員生涯有幾多年？當中亦都可能有好多意想唔到嘅事情，所以佢哋喺有能力時爭取最好嘅回報，係好合理嘅。如果第時有人同我講，某位球員依家踢得好好，當年佢喺和富大埔出道，我諗我都會與有榮焉，對我嚟講都係一種讚美。」

Gary續說︰「有啲球會做青訓，主要目標唔係成績，係有好嘅球員輸出去賣到錢，然後再培育新球員，有啲球會係想追求成績，所以佢哋會不惜一切買最好嘅球員。和富大埔喺我管理下着重平衡，追求成績嘅同時，亦都要睇球員出路。之前受訪時講過，我自己都係一個足球員，有踢過香港青年軍，所以真心覺得自己係呢個球圈一分子。我覺得唔係個個見到個果先去摘個果，呢個世界需要有人種一棵樹出嚟，先至會有一個果。」

目標高先好！瞄準亞協盃4強

繼2010年後，和富大埔再次踏足亞洲戰場，蔡尚圻為球隊定下4強（跨區賽）的目標︰「亞協盃始終係本地足球一個里程碑，我哋將目標定喺4強，因為我覺得目標定得高啲，大家先會努力去闖出嚟。將目標定得高，唔代表冇可能做到，希望透過亞洲舞台，令和富大埔同香港足球得到更多人認識。當然，今年成績到現時為止唔係最理想，但係除咗用結果去衡量一件事，大家都應該睇個過程。無論盃賽又好，聯賽又好，其實我哋都未放棄，尤其今年咁多隊都平均咗，一場波嘅勝負已經爭好遠，如果我哋贏冠忠南區同東方龍獅的話，已經可能喺聯賽榜排高好多。」

圖/文：何彥霆