D1大戰前李嘉耀醒聖若瑟錦囊
南華籃球隊教練李嘉耀及著名籃球評述員丘雨勤，昨日出席NIKE「Dribble &」校訪活動，與聖若瑟英文中學學生交流，「大隻耀」更親自落場與籃球隊員們參加各項挑戰，一班大戰在即的籃球隊員亦顯得相當積極。
「同學支持上下一心」
聖若瑟英文中學於「九龍區D1中學校際籃球比賽」不敵寶覺中學後無緣決賽，下周一（19日）將與英華書院爭奪季軍，勝出者將獲得「NIKE全港學界精英籃球比賽」入場券，李嘉耀鼓勵聖若瑟「上下一心」抗勁敵：「我自己未試過打學界比賽，但我知道比賽氣氛真係好好。我認為校隊成員努力之外，其他同學支持都好重要，入到精英賽就係佢哋實現夢想嘅第一步。」
聖若瑟隊長張國希強調，球隊會以打不死精神迎戰：「英華係一隊節奏好快嘅球隊，希望盡量減少失誤、主動進攻，控制好節奏。今年隊中大部分主力都已經中六，開季前大家定下共同目標，希望最後一年做到最好，學界要打入前三入精英賽。球隊實力近年開始同九龍區勁旅拉近，原因係我哋『St.Jo仔』有打不死嘅意志，起碼要同佢哋平起平坐！」去年聖若瑟正正於學界季軍戰以22分不敵英華無緣精英賽，為免惡夢重演，張國希透露球隊今年向教練要求加操：「籃球令我知道，機會一定有，係睇你爭唔爭取到，我哋一定要努力裝備自己，如果唔係機會嚟到只會白白流走。」
余樂詩報道