余煒廉多得背後的男人
去季在陽光元朗表現可人的年輕中堅余煒廉，今季轉投理文後旋即站穩正選。不經不覺，這位小伙子已是第3季征戰港超聯，他表示所有事情都來得比想像中快，而這一切，都要歸功「煒廉」背後的男人——曾昭達。
與恩師曾昭達自中一開始結緣，至今已有9年光景，「煒廉」感激「達Sir」悉心教導：「好感謝佢一直喺身邊，同埋上一季畀咁多機會我，始終職業足球好難擺一個咁後生嘅球員喺一個咁重要嘅位置，因為一犯錯就會輸波，佢對我信任度好大先會擺我落去，多謝佢呢份信任。」
年輕人選擇投身職業足球，往往受到家人的壓力而放棄，這種例子俯拾皆是。年僅20歲的余煒廉決意投身職業足球時，家人卻沒有反對。「煒廉」現在能夠安心追夢，「達Sir」居功至偉：「除咗教練，佢仲係我一個好朋友。「達Sir」會教我做人，佢同人溝通比較好、好識得了解球員，畀到好多好有用嘅意見我。屋企人都好相信呢位教練，當年我要考文憑試，但都簽咗踢元朗，屋企人相信『阿達』會睇住我，唔會畀我因為一樣嘢而放棄另一樣。我自己都好信佢，有咩困難除咗問屋企人，就會問佢。」
恩師曾昭達由「細」執起
年輕，一方面象徵活力，然而從另一角度看，卻代表經驗不足。余煒廉表現愈趨穩健，全因「達Sir」執着細節：「我中學時代同踢職業隊，佢教我嘅嘢差唔多，一直都希望我唔好將個波亂踢。去到職業層面，佢就將細節提升，可能我中學時一啲細微嘅犯錯無傷大雅，但去到職業層面呢啲犯錯，就會令球隊輸波。所以「達Sir」幫我將壞習慣改變，藉以適應職業聯賽。」
上季元朗表現讓人眼前一亮，更在銀牌決賽力克東方龍獅奪標。季中開始獲得上陣機會的「煒廉」憶起這段經歷時難掩興奮之情：「最深刻？應該係4強對傑志，自己好有決心想話畀人聽，我哋有能力做到，好想贏，結果我哋做到、打到一份拚勁！嗰場之前傑志冇輸過波，當我哋贏到嘅時候，士氣、氣氛都好，嗰年嘅聖誕節都過得特別開心！」
目標外流？入選港隊先！
在香港，每一個足球員都渴望披上代表這個城市的紅色戰衣，早前「煒廉」在港澳埠際賽中獲得徵召，更在比賽中攻入職業生涯首個入球。雖然如此，但他仍謙稱自己在各方面都有改善空間。他下一個目標，也離不開香港隊：「今季目標係睇吓有冇機會入選省港盃名單，外流固然想，但首先要喺本地賽事做番好，要有表現先吸引到外地嘅目光招攬你，如果你喺本地踢比賽，連香港隊都唔揀你嘅時候，仲講咩出外呢？所以首先要得到香港隊認同先。」
圖/文：陳焌鏗