慕沙最緊要個信字
佳聯元朗今季不斷為球迷帶來驚喜，上輪聯賽更在最後一刻逼和上季「3冠王」傑志，當中新加盟的巴西前鋒慕沙令球迷印象深刻。球隊有好表現，慕沙認為全因「信自己」：「對好多人嚟講，可能係驚喜，但主教練郭嘉諾成日同我哋講，只要你相信就可以做到！我哋仲要互相幫助，無論邊個犯錯最緊要互相幫忙，令所有嘢變得簡單！」
元朗今季首場比賽便要硬撼去屆亞軍和富大埔，慕沙僅用8分鐘就取得在港的首個入球，最終這場「地區打吡」激和4比4。回想該仗，慕沙仍津津有味：「今季係我首次踢港超，賽前好多人都唔睇好我哋，但當我入波後，一班隊友都相信：『我哋元朗係得嘅！』，我哋要信自己、信隊友，每日勤力操練，第一場比賽冇輸到係對我哋一個鼓勵！」
感激郭Sir悉心灌溉
如果成功是一朵花，信任和勤奮就是土壤和水分。自賽和傑志後，「瘋狂逼搶」與「佳聯元朗」已畫上等號，現在球員能不惜氣力地奔跑，慕沙感激「郭Sir」協助：「頭兩個月佢做咗好多嘢增強我哋能力，依家我哋力量同體能都好好，呢樣嘢係元朗比其他球隊優勝嘅地方。」想起7月初到埗，慕沙坦言香港天氣極難適應：「香港嘅炎熱真係好難頂，對腳好似着火咁，但每支球隊都面對一樣情況，所以我哋只可以做好自己、去適應天氣。」
賽前備戰朗拿度「幫手」
現時已射入兩球的慕沙，當問及今季個人目標時，他正經地說：「我唔會同任何人講我嘅入球目標，就算我老婆問起都唔會講。因為我係基督教徒，經常祈禱，呢個目標就係我同上帝之間嘅秘密，我覺得係一種承諾。」雖然慕沙不願透露目標，但他分享了一個小秘密：「比賽前我會睇朗拿度嘅片，亦會祈禱，令自己唔好諗太多比賽上嘅嘢。去到比賽就盡全力，因為每場比賽都係唔容易，最緊要係保持一個良好心態，不斷嘗試先係最重要！」
圖：何彥霆
文：陳焌鏗