on.cc東網直播中秋假期港超激戰
中秋節公眾假期最佳節目，當然是入場睇好波啦！「中銀人壽香港超級聯賽」今日上演2場好戲，頭場下午2時30分假青衣運動場上演，由日前殺入「高級組銀牌賽」8強的夢想FC與和富大埔交鋒；下午5時30分於旺角大球場則爆發宿敵對決，由上季「3冠王」傑志鬥東方龍獅。
夢想FC和富大埔鬥攻
深陷「2018不勝魔咒」的夢想FC，今季聯賽仍未見起色，開季2連敗，幸上周四在「高級組銀牌賽」首圈鬥香港飛馬，儘管一度落後，最終非但在法定時間內追和，更憑互射12碼淘汰對手，取得今年首場勝仗。今午聯賽面對鋒力強大的和富大埔，主教練梁志榮期望年輕球員可以繼續交出水準：「唔好理對邊隊，過得一關得一關，我哋唔係強隊，可以放開啲去踢，希望呢班年輕球員可以透過比賽，表現到自己，爭取到入選香港隊。」
「細榮」亦寄望上場勝仗，能激發球員以弱勝強之決心：「球員初段唔夠集中，做唔到我哋要求嘅嘢，之後做到一齊逼搶，效果好好，我哋就係要呢啲，點解唔放膽去做呢？經過頭兩場之後，大家都清楚要再進取啲，肉緊啲！齋搓唔攻冇用！上場效果OK，希望慢慢再做好啲。」
堅Sir唔敢輕敵
和富大埔在首兩輪聯賽合共攻入8球後，上周五晚於銀牌賽，憑「長人」哈利大演帽子戲法，加上陳肇鈞及艾華度各入1球，以5比0擊敗凱景，主教練李志堅更表示，該仗安排哈利、李家豪和基藍馬等新兵打正選效果理想。對於夢想FC的評價，「堅Sir」強調絕不能輕視對手︰「我有睇佢哋嘅比賽，佢哋係一支唔錯嘅球隊，尤其喺進攻、組織方面。我覺得夢想絕對係一支唔可以睇小嘅球隊，班球員好進取同好有拚勁。」（on.cc東網周二下午2時30分直播）
傑志東方龍獅互砌
颱風「山竹」除令傑志上周對富力R&F的聯賽延期舉行外，賽馬會傑志中心亦慘遭風雨蹂躪至無法如常運作，主教練朱志光直言要「打游擊」練波，或多或少會帶來一些影響︰「雖然情況唔算係最差，但有啲從天堂跌落地獄嘅感覺，好彩可以短時間內修正到，嚟緊將軍澳訓練基地開埋，可以短期內幫我哋解決搵場地練波呢個問題。」
此外，「藍鳥」目前還受到傷兵問題困擾，費蘭度和盧卡斯兩名進攻主力都有傷在身，林恩許亦都上陣成疑。不過「朱Sir」認為，球員心態比起傷患問題更為關鍵︰「前線有兩個球員受傷都幾大影響，調節球員心理係我當前急務，我唔想球員去諗受到咩影響或者練波唔慣等等，幸好傑志嘅球員都係身經百戰嘅，同埋大家夾咗咁耐，彼此都好清楚大家諗法，所以我都唔太過擔心。」
今季重新出發的東方龍獅，在首周聯賽以3比2反勝富力R&F，惟因國際賽期，加上颱風影響，已3周沒有正式比賽，期間球隊雖曾與佳聯元朗、冠忠南區拍跳，但主教練陳婉婷坦言對比賽狀態有影響︰「始終開季到依家我哋唔係好夠比賽，不過傑志都面對相同情況，所以我哋會喺訓練上做番足啲，亦踢咗幾場友賽，盡量保持好嘅士氣同狀態去迎接呢場大戰。」
往績輸蝕牛丸︰要向前看
雖然近幾次交手東方龍獅都未能取勝，但「牛丸」認為應該向前看，她說：「過去已經過去，每支球隊任何時間、任何配搭都係一個新嘅組合，冇需要去比較，亦冇需要為自己增添一個包袱。我哋全心全意去踢好每場比賽，就算對方有好多傷兵，咁又點？我唔相信佢哋會因為某一至兩個球員而影響成隊波。我哋最緊要做好自己，踢番對富力嗰場嘅鬥志出嚟，我哋對今場好有信心。」東方龍獅目前只有黃梓浩一員傷兵，其餘球員均可候命。（on.cc東網周二下午5時30分直播）