港足16強畢業郭sir收貨

香港U23 0:3 烏茲別克U23
香港U23男足奮力一戰，出局亦無憾！（袁志浩攝）

在分組賽3戰全勝、以B組首名出線的烏兹別克，甫開賽便積極從兩側斬出高波進攻，不過港隊分別由隊長劉學銘及門將袁皓俊多次瓦解對手攻勢。而港隊隨後於16分鐘有余沛康接應隊友長傳，於右路禁區頂快射斜出。實力較強的烏兹別克戰至27分鐘先開紀錄，艾列巴夫乘着袁皓俊手槌打出右路傳中角球不遠，於禁區外抽射世界波入網。港隊於完半場前踢少1人，余沛康因飛剷對手直接領紅被逐，半場落後1球返回更衣室。

踢多一個的烏兹別克下半場連入兩球奠定勝局，60分鐘港隊門將袁皓俊撲出勁射後，烏茲別克的施迪高夫接應隊友回傳近射破網；接着5分鐘後，烏列保夫接應隊友頭槌二傳，門前插水式頂入，最終以3比0勝出，宣判港隊U23出局。

佐迪（右）於烏茲別克球員面前一騷功架。

雖然對方拉手，但劉學銘（左）依然成功保護腳下球。

未來亞洲盃希望

港隊主教練郭嘉諾賽後指早已料到雙方水平有差異，惟一班U23球員最後階段於場上逼搶，他感謝球員燃燒體力及鬥志，為全隊感到驕傲：「今次備戰情況差，大家集合時間短，能夠達成小組出線嘅目標，已經收晒貨。我覺得呢班U23絕對係4年後亞洲盃外圍賽嘅重要球員，希望未來港隊主帥可以重用佢哋，幫香港攞下屆亞洲盃入場劵！」

被問及上仗有否後悔不派最強陣容迎戰，導致16強要面對強敵，郭Sir為此作出解釋：「雖然和波可能會走條好線，但對實力強嘅對手先可能學到更多，年輕球員要習慣對亞洲列強，知道彼此差距，再畀心機拉近，切忌原地踏步。」