雖然萌系女生有佢嘅吸引力，但係男人到咗某個年紀，會發現成熟女人味先係最正，愈睇愈吸引。就好似南韓模特兒閔秀雅咁，從最初嘅萌味娃娃，變成今日女人味十足，動人嘅氣質令人每次見到佢，都會有心動嘅感覺。
正所謂女大十八變，不過係咪愈變愈靚呢？對於閔秀雅嚟講，佢係一直以嚟都咁吸引，由出道至今都備受注目，隨住年齡增長，魅力愈嚟愈迷人。呢位喺南韓首爾出生嘅模特兒，不但擁有高挑嘅身材，三圍更係玲瓏浮凸，但原來佢最初未有諗過會成為模特兒界中嘅一員，反而希望能夠成為一位攝影師。當年在學時期，佢喜歡四圍去旅行影相，並且希望有朝一日能夠開設攝影室。既然係咁，佢又點解會入行做Model呢？話說有次佢個攝影師朋友拍攝一輯產品照，點知模特兒臨時甩底，於是問當年個樣極萌嘅秀雅能否幫忙客串，就咁樣佢就出咗鏡，之後佢被模特兒事務所睇中，經過一番游說後，佢決定嘗試兼職攝影模特兒工作。
據佢解釋當時應承嘅原因有兩個，一來想試吓喺鏡頭前工作，對佢嚟講相當有新鮮感，二來想搵快錢，作為開設攝影室嘅資金。而憑住萌味十足嘅樣貌及魔鬼級身材，好快喺攝影模特兒界獲得相當高嘅人氣，更被冠以「瓷娃娃」嘅外號。隨住人氣愈嚟愈高，於是佢決定轉做職業模特兒，希望未來喺當中獲得好成績。
其實喺轉做全職之前，佢早就以車模身份喺首爾同釜山舉辦嘅大型國際車展上登場，化身成萌系美少女嘅佢，配以性感制服，不知吸引幾多鏡頭，而轉做全職後曝光率多咗，人氣更係直線飆升。轉眼間，秀雅喺模特兒界已經打滾咗一段日子，並且步入中女之齡，佢深知繼續以萌味形象示人，會予人格格不入嘅感覺，於是佢決定參加比堅尼模特兒大賽，透過比賽不但可以令佢嘅知名度提升，仲可以趁呢個機會改變形象，盡情展現自己嘅女人味。事實證明佢呢個改變絕對係成功，事關佢不但奪得比賽冠軍，優雅嘅氣質更係迷倒唔少男士。
知名度大大提升後，佢決定踩入賽車場，化身成超性感嘅賽車女郎，展露迷人嘅事業線及誘人嘅臀部，令事業再上一層樓。不過秀雅仍未滿足，翌年決定再次挑戰自己，參加賽車女郎大賽，多年嘅模特兒工作經歷都唔係重點，最重要係佢憑住迷人嘅外形及氣質，加上前凸後趷嘅身材，結果奪得最佳模特兒大獎。經過呢次比賽後，令人氣成功攀上高峰，不過對佢嚟講，卻認為最重要係可以令自己成功轉型，以熟女形象勇戰模特兒界。
簡介：閔秀雅最為人動心嘅地方，固然係佢迷人嘅樣貌及火辣身材，而講到佢能夠喺模特兒界屹立不倒嘅原因，在於佢愈嚟愈成熟，散發出動人嘅女人味。當然佢仲有一個令男士心動嘅地方，就係幾時都咁誘人嘅美腿。如果大家想了解佢多啲，就要Click入呢個網站喇！
網址：http://cafe.daum.net/minsooa
出生地：首爾
身高：170cm
三圍：34-25-35
撰文：魂